"Pagcor connection" sa ephedrine test

Kadudahan kaayo ang resulta sa confirmatory test sa Philippine Drug Enforcement Agency – Manila sa 7.7376 gramos nga powder substance, ug nagtuo ko nga gamhanang sindikato sa ginadiling drugas migamit sa impluwensiya ug salapi alang niini.

Ang duha ka Insik – silang Xuiyu Tan, 27, ug Tek Man Wong, 55, nadakpan sa Mactan Cebu International Airport tungod sa pagdala og tulo ka putos nga gidudahang precursor sa “ephedrine” ug $20,000 nga salapi, nga wala ipangdeklarar.

Sa dihang gipugngan silang Tan ug Wong, ang nasakmit nga tulo ka putos nga gidudahang gamiton sa pagbuhat og shabu, gipa-ilawom sa laboratory test didto mismo sa airport.

Nasota sa testing nga ephedrine ang maong powder substance tungod kay mi-asul ang kolor sa likido nga gibuboan sa pulbos.

Sumala pa sa usa ka reporter nga mi-cover sa pagdakop kang Tan ug Wong ug sa pag-paubos sa labtest sa pulbos nga gidala sa duha ka Insik, nakugang ang mga opisyal nga nanambong.

Didto sa maong pagdakop ug pag-testing sa powder substance nga nasakmit silang Cebu Customs District Collector Ronnie Silvestre ug direktor sa PDEA-7 nga si Adrian Alvariño.

Mismo si Alvariño, matud pa, disidedong mopadakop kang Tan ug Wong tungod kay napamatud-an sa actual test nga ephedrine ang maong powder substance.

Apan taliwala sa proseso, kalit mibagting ang mga telepono sa mga opisyal.

Pagkataud-taod, kalit lang mitambling ang baruganan ni Alvariño kinsa kalit lang miingon nga “ipa-confirmatory test” lang una ang maong powder substance adto sa PDEA-Manila” sa dili pa sila mokonpirmar nga ephedrine ba gyud kadto.

Apan wala dayon mapugngi ang mga sakop sa media pag-report nga ephedrine ang maong powder substance.

Marso 2 nahitabo ang pagdakop kang Tan ug Wong ug pag-testing sa maong “ephedrine.” Pagka-ugma, Marso 3, gi-report sa tanang mantalaan, radio ug telebisyon nga ang PDEA-7 ang mikonpirmar nga “ephedrine” kadtong powder substance.

Apan, pagka-Marso 4, nahugno ang mga Sugboanon sa balita kay ang PDEA-Manila miingon nga dili illegal drugs o precursor sa illegal drugs ang powder substance nga nakuha gikan sa duha ka Insik.

Unsa man diay kadto? Matud pa sa balita nga ang maong pulbos gikan kuno kadto sa Fujian Agriculture and Forestry University.

Motuo mo nga ang maong pulbos gamiton kuno kadto isip enhancer sa “tawgi”?

Silang Tan ug Wong mogasto og plete sa eroplano ug pagpuyo sa hotel dinhi aron lang sa pagdala og patubo sa tawgi?

Kinsa man ang nagsugo nila? Mao kini, angay suhiron sa mga awtoridad. Kay kun nasota nga wala silay agricultural undertaking dinhi sa Sugbo o sa mga silingang probinsiya, kadudahan kaayo ang pagdala og patubo sa tawgi.

Sa tunghaan sa elementarya kaniadto, ang tawgi patuboon ra man na sa medias nga gibasa og tubig. Hehehe!

* * *

Apan taym pa ra gud, kinsa man kadtong mga tawo nga nanawag sa mga opisyal, ilabi na ni Alvariño, nga didto sa pag-hold nilang Tan ug Wong ug sa pag-testing sa powder substance?

Adunay nagtug-an kanato nga kadtong tawo nga nagtawagtawag sa mga opisyal usa ka “PAGCOR connection.”

Kinsa man kaha?

Aduna na nay ngalan nga gitug-an sa usa ka reporter. Matud niya ilado kuno kining maong tawo tungod kay nag-operate kini og pasugalan.

Apan hinganlan nato kini siya sa sunod natong Tikdol sa Pordoy kun makonrpirmar sa mga awtoridad ug hinganlan nila kini. Pugngan angay sa mga awtoridad nga makasulod ang ingon nga mga substance nga pagsambog sa paggama og ginadiling drugas tungod kay kun molampos ang mga sindikato, daghang kabatan-onan ang madaot tungod sa paggamit sa produktong drugas niini, ilabi na ang shabu.

* * *

Usa ka higala nga assigning examiner sa Assessment Division sa BOC-Cebu nga mahigugmaon sa pinulongan og kulturang Sinugboanon, mitunol kanato og lista sa mga maka-uulaw nga sayop sa pagsulat o pagsulti.

Si Arnoldo “Boy” Famor nga lumad nga taga Mindanao, miasoy kanato nga manlimbawot ang iyang balhibo kun makapaminaw ug makabasa sa mga report sa mga bag-o ug batan-ong mga reporter sa Sugbo tungod sa daghang sayop sa ilang pagsulti.

Basaha kining iyang nabantayan, dili ba maigo sab kamo:

SAYOP: Mao gali nga namatay kay nalumos sa dagat.

SAKTO: Mao gani nga namatay kay nalumos sa dagat.

SAYOP: Ihatag nila sa akoa ang kuwarta.

SAKTO: Ihatag nila nako ang kuwarta.

SAYOP: Akong ihatag sa ilaha ang kuwarta.

SAKTO: Akong ihatag nila ang kuwarta.

SAYOP: Ang tawo na adunay pangandoy, kanunay’ng momata og sayo.

SAKTO: Ang tawo nga adunay pangandoy, kanunay’ng momata og sayo.

SAYOP: Dapat ba nga lunsay ang atong Binisaya?

SAKTO: Angay ba nga lunsay ang atong Binisaya?

SAYOP: Gidumog si Pacquiao paghiabot sa Cebu.

SAKTO: Gitapuk-an si Pacquiao paghiabot sa Cebu.

SAYOP: Ang Luzon mao ang pinakadako nga isla sa Pilipinas.

SAKTO: Ang Luzon mao ang kinadak-an (labing dako) nga isla sa Pilipinas.

DAGSA – gipadpad sa baybayon gikan sa nalunod nga bangka (pananglit: Midagsa sa Talisay gikan sa halayong isla sa Camotes.)

DAGSANG – midaghan (pananglit: Midagsang ang mga bolinaw. Nga buot ipasabot, midaghan ang mga bolinaw.)