Basura sa Kalunasan gipasagdan

Unsa may nahitabo sa garbage collection sa Barangay Kalunasan nga daw sa gipasagdan naman ni Kapitan Nunilon Monares?

Kapin na sa duha ka semana nga wala makuha ang basura sa barangay, labihan nang hugawa sa mga karsada tungod sa nagpasad nga mga wala makolekta nga basura.

Di man gud unta angayan nga ipagawas daan ang mga basura samtang wala pay trak nga mokuha niini. Apan ang kadaghanan nga naanad nga dunay trak nga mokuha sa gitakdang adlaw mibutang daan sa ilang mga basura sa daplin sa karsada.

Tungod kay wala man trak nga miabot aron sa pagkuha sa basura napasagdan kini nga nangakay-ag ug nagpasad tungod kay gibungkag sa iro ug uban pang hayop.

Inigsaylo nimo sa Barangay Hall paingon na sa duha ka mga prisohan maoy mosugat sa imong mga mata ang nakay-ag nga mga basura nga murag kapin na sab sa duha ka semana nga nagtipun-og sa daplin sa karsada.

Labihan gyud ka hugaw ug makauuwaw sa mga bisita nga moduaw sa mga piniriso sa CPDRC ug sa City Jail. Labi pa gyud sa mga langyaw nga mosud-ong sa pasundayag sa mga dancing inmates sa CPDRC ug sa mga langyaw nga modayo aron pagpanagkot diha sa Berhin sa Guadalupe diha sa Langub Shrine.

Wala gyud mauwaw si Kapitan Monares sa maong talan-awon? O wala lang gyud siya masayod sa maong sitwasyon?

Akong tambag ni Kapitan Monares suroya ang imong barangay aron ka masayod sa sitwasyon niini. Ayaw pagtinapulan kay daghan pa ang angayan nimong buhaton alang sa barangay.

Kun magpadayon ka sa imong katapulan ug ka way pagpakabana sa problema sa imong tugkaran mas maayo tingali nga moluwat ka nalang sa imong katungdanan. Kun dunay problema ang sakyanan sa barangay ang maayong gibuhat ni Monares mao ang pagrekurida aron ipahibawo sa mga molupyo nga hipuson una ang ilang mga basura hangtud nga duna nay sakyanan nga makakuha niini.

Kun dili man makakuha ang sakyanan sa barangay maayo tingali na nangayo una siya og tabang gikan sa dakbayan sa Sugbo pinaagi sa pagpanghuwam una og sakyanan nga makahakot sa basura.

* * *

[email protected]