Easter Sunday

Karong adlawa mao ang pagkabanhaw ni Kristo Hesus gikan sa mga patay. Usa kini ka importante nga adlaw alang sa milyones ka mga Kristiyano, ilabina sa mga Katoliko, sa tibuok kalibotan.

Tungod kay Easter Sunday karon, panahon karon sa pagmaya alang sa mga Katoliko ug uban pang denominasyon nga nagselebrar niini. Nagmaya ang tanan gumikan sa pagkabanhaw sa manunubos 

Gawas sa Disyembre 25, ang adlaw sa pagkabanhaw maoy labing importante nga adlaw alang sa mga Kristiyanos. Hinuon dili permanente matag tuig ang petsa sa pagkabanhaw ni Kristo Hesus. Kini tungod kay managlahi ang panahon usab sa kwarisma.

Dili ko Katolitko apan isip Kristiyano, moduyog usab ako sa pagselebrar sa pagkabanhaw sa manunubos. Hinuon, sa among tinuohan, lahi ang paagi sa pagselebrar sa iyang pagkabanhaw.

Bisan unsa pa man ang paagi sa pagselebrar sa mga nagkalain-laing denominasyon, usa ra ang tumong niini. Ug kini mao ang pasalamat nga nabanhaw ang manunubos.

Si Kristo namatay sa krus tungod sa atong mga sala. Siya nagpakamatay gumikan kay gusto niya kitang luwason gikan sa ka hugaw sa atong binuhatan dinhi sa kalibotan.

Gumikan sa pagkamatay ni Kristo, nahinloan gayud ang atong mga sala. Imbis nga kita unta ang angay nga itaral ngadto sa krus tungod sa atong mga sala, siya mismo ang miula sa iyang dugo aron kita makabaton og kaluwasan.    

Ang pagkabanhaw ni Kristo Jesus maoy naghatag usab kanato og paglaum nga bisan pa sa atong pagkamakasasala, dili halayo nga makabaton kita og kinabuhing dayon. Kini pinaagi sa iyang dugo nga giula sa krus. Apan kini sa kondisyon nga magtinarong usab kita sa atong pagkinabuhi ning kalibotana   

Apan unsa kaha kun wala pa nagpakamatay si Kristo Jesus? Makabaton pa ba kita og kaluwasan?

Sa akong tan-aw dili siguro. Ang nag-unang rason ngano nga nagpakamatay ang atong manunubos mao ang pagtubos sa atong mga sala.

Gani, usa ka dakong plano ang pagpadala sa Ginoo sa iyang bugtong Anak aron pagluwas kanato. Tungod sa iyang dakong gugma sa kalibotan, dili gayud mahimong biyaan sa Ginoo ang iyang mga katawhan.

Apan unsa kaha kun wala pa nagpakatawo si Kristo sa kalibotan? Siguro wala gayud kitay paglaum sa kaluwasan. Gani, puno na ang kalibotan karon sa mga sala sa katawhan.

Ug tungod sa iyang pag-ula sa iyang dugo sa krus, mapasalamaton kita tungod kay dili na halayo ang kinabuhing walay kinutoban. Kana tungod usab sa dakong gugma sa Ginoo kanato.

Angay gayud kitang magmaya sa pagkabanhaw sa atong manluluwas. Usa karon ka espesyal nga adlaw dili lamang gumikan kay siya nabanhaw kondili natuman usab ang saad sa Ginoo nga pinaagi sa iyang anak, makatagamtam og kinabuhing dayon kadtong motuo kaniya.

    Hinuon nagka-moderno na ang kalibotan ug nagkalain-lain na usab ang pamaagi pagselebrar sa pagka-banhaw ni Kristo. Apan bisan pa niini, wala pa gihapon nawala ang hugos ug egg hunting panahon sa Eater Sunday alang sa mga Katoliko ug ubang denominasyon.

Ug nahimong commercialized na usab kining maong kasaulogan. Kini tungod kay ang uban mas piliong mag-party sa beach ug ubang lugar. Apan bisan sa unsang paagi, at least gipahinungod kini sa pagkabanhaw sa manluluwas.

* * *

Email: [email protected]