EDITORYAL - Hatagan ta'g dakong bili

Ning panahon sa Semana Santa, time-out una kita sa mga pagbuhat nga mibaliwala sa sakripisyo sa atong Ginoo atol sa Iyang pasyon ug kamatayon sa krus didto sa bukid sa Kalbaryo.

Kini maoy awhag sa usa ta ka higalang pari -- kura paroko -- ug misangon kita sa maong awhag.

Tuod man angay natong hatagan og dakong bili ning mga adlawa diin kitang mga Kristiyanos misaulog sa pasyon ug kamatayon sa atong Manunubos.

Kini gung kapait nga naagian sa atong Ginoo Iya kining giantos ug gibuhisan sa Iyang kinabuhi alang kanato -- alang sa atong kaluwasan.

Busa, husto ang higala tang kura paroko sa iyang pag-awhag kanato nga atong hatagan og dakong importansiya kining mga adlaw sa Semana Santa pinaagi sa pagsalikway sa mga buhat nga misukwahi sa tiunay nga mensahe sa pasyon ug kamatayon sa atong Ginoo.