Panahon na sa  pagpatunga

Gikatakda nga magtigom ang mga dagkong opisyal sa tibuok kalibutan aron tukion ang suliran sa pagkaon. Tubag kini nila sa miulbong kagubot sa mga nasud sa Egypt, Haite, Cameroon, Mauretania, Ethiopia, Madagascar ug Indonesia tungod sa nasinating kakuwang sa pagkaon ug pagtaas sa prisyo sa mga nag-unang palaliton. Maoy mobukas sa nahisgutang tigum ang Secretary General sa United Nation nga si Van Kee Moon ug gipaabot nga iyang ipresentar sa maong tigum ang lakang nga himuon sa United Nations.

Dili lang kakuwang sa pagkaon ang suliran nga giatubang karon sa kalibutan. Ang kalibutan gihamok usab karon sa way puas nga pagtaas sa prisyo sa lana nga sa tan-aw nato dili na makiangayon ug makatarunganon. Busa kining maong suliran angayan usab segurong tuki-on sa mga lider sa kalibutan.

Ang Pilipinas nga nagsalig sa supply sa lana sa kalibutan usa sa mga nasud nga naapektuhan sa pagtaas sa prisyo niini. Gani bisan unsa na lang ang gihimo sa gobiyerno aron maminusan ang epekto niini ngadto sa katawhan ilabi na sa sama kanatong mga kabus. Mihatag na og subsidy ug diskuwento ang atong gobiyerno ngadto sa mga drivers ug operators aron dili kini mangayo og taas nga umento sa pletihan. Gipatas-an na ang suholan sa mga mamumuo ug gipabilin sa tag 18.25 pesos ang prisyo sa NFA rice. Apan wa kini makaiban sa kabug-at sa gisung-ay natong suliran, ang kataas sa prisyo sa mga palaliton mugna sa pagsige og taas sa prisyo sa produktong petrolyo sa kalibutanong merkado.

Ang sulbad sa gobiyerno sa nahisgutang suliran dili epektibo kay di kita ang nagkontrolar sa prisyo sa lana sa kalibutanong merkado. Ang prisyo sa lana gikontrolar kini sa mga nasud nga sakop sa OPEC kon Organization of Petroleum Exporting Countries nga usa ka dakong cartel. Ang OPEC miabuso na sa pagsige og pataas sa ilang prisyo sa lana. Gani matud pa sa mga guwatsinanggo nga ang mga sakop sa Opec mopataas sa prisyo sa ilang lana kun magpabunyag sa ilang apo o ba kaha magpakasal sa ilang anak ang oil ministers niini.

Sugyot nako ngadto sa atong gobiyerno mao ang paghimo og representation ngadto sa United Nations ug sa ASEAN aron hangyoon ang OPEC nga dili magpalabi sa pagpataas sa prisyo sa ilang lana. Wa pa ko malimot sa gihimong pagbraso sa Amerika ngadto sa OPEC dihang nakasinati upod kini og krisis tungod sa lana. Tungod sa gihimo sa Amerika naaghat sa pagpataas sa ilang produksiyon sa lana ang OPEC nga miresulta sa paghunong sa pagsige og saka sa prisyo sa ilang lana.

Ang Pilipinas way kusog sa pagbraso sa OPEC kay huyang kita nga nasud busa ang atong mahimo mao lamang ang pagpaabot sa atong sugyot ngadto sa ASEAN o ba kaha sa United Nations nga mahunong na kining di makiangayon ug di makatarunganon nga pagtaas sa prisyo sa produktong petrolyo sa kalibutanong merkado. Ug kay magtigum man ang mga dagkong lider sa nasud didto sa Roma sa Italya manghinaut ta nga maapil sa ilang hisgutanan ang abuso sa OPEC.

* * *

Gipaabot nga sugdan niining semanaha o ba kaha sunod semana ang paperless system sa Bureau of Customs sa Port of Cebu ug Land Transportation Office aron mapaminus ang corruption ug mapadali ang serbisyo niini ngadto sa ilang mga kliyente. Ubos niining maong sistema, electronic na ang transmittal sa mga Certificate of Payment kon CP. Ang sistema nasabutan human magtigum sila si Carlos Corsiga, hepe sa Assessment sa Bureau of Customs, mga opisyal sa LTO ug 50 ka mga importers ug assemblers diin ilang gituki ang suliran sa langay nga pagpagawas sa mga Certificate of Payments. Matud pa ni Florante Ricarte, Assistant Chief sa Assessment nga kun masugdan na sa pagpatuman kining maong sistema hayan mapalambo pa ang business climate ug motaas pa ang collections sa BOC. Hinaut pa unta nga dili malangay ang pagpatuman niining maong sistema.