Anay sa gobiyerno

Dili na bag-o ang kompirmasyon sa kapolisan ug militar nga dunay mga lokal nga mga opisyal sa gobyerno nga nagpaluyo sa kalihukan sa mga rebeldi.

Dugay na nga nasayod ang kapolisan ug militar niini apan ang pangutana unsa may inyong gihimo? Mas interesado ang publiko nga masayod kon unsay gihimo sa militar ug kapolisan batok sa mga opisyal nga atua mosuporta sa kalihukan sa mga walhon samtang nagpahimulos sa gahom ug kwarta sa gobyerno.

Ang gipaabot sa katawhan mao nga mapasakaan og kaso aron mataktak gikan sa katungdanan ang maong mga opisyal tungod kay sila maoy anay sa kagamhanan nga hinayhinay nga mikutkut aron paglumpag sa tigbayon sa lehitimong panggobyerno.

Kagahapon gikompirmar ni Sr. Supt. Lani-o Nerez ang deputy regional director for operations sa kapolisan dinhi sa rehiyon nga duna gyuy mga lokal opisyal nga nagpagamit o gigamit sa mga rebeldi. Si Lt. Col. Jesus Alvarez nga maoy pangulo sa 78th Infantry Battalion hinuon dali nga nakasawo pinaagi sa pag-ingon nga napugos lang sila tungod sa kahadlok.

Bisan klaro na gusto pa gyong tapin-an sa militar ang mga politiko nga nagsuporta sa mga rebeldi. Mao ni'y labing bug-at nga rason nganong hangtud karon wa gyud silay nahimo paggukod kanila tungod kay atahado o di ba kaha hadlok sila sa mga politiko.

Ang sayon rang itumbok sa militar mao kadtong mga grupo sa mga militanting grupo nga nagsuporta sa mga rebeldi. Way lalis niini, apan unsa may kalainan sa mga politiko nga nagpaluyo sab sa mga rebeldi ug niining mga militanting grupo?

Ang buot nakong ipasabot kon gitumbok sa militar atubangan sa publiko nga kining mga grupo sa Bayan ug uban pang alyadong mga organisasyon nagpaluyo sa mga NPA nganong dili man nila mahimo sab ang paghubo sa maskara sa mga lokal nga opisyal aron masayran sa publiko.

Sayon rang ilhon ang mga lokal nga opisyal nga tuang kapusta sa mga rebeldi tungod kay di ni gustong masulbad ang kalisod sa mga molopyo diha sa ilang dapit. Ngano? Tungod kay kon masulbad ang kalisod mawad-an man sila og isyu paghilo sa huna-huna sa mga pobre aron pagsuporta sa ilang kawsa.

Busa kadtong mga mayor nga bisan giunsa pagdapit sa gobernador aron hisgutan ang sulbad sa insurgency sa ilang lungsod ug aron matubag ang mga panginahanglan sa batakang serbisyo sa katawhan angayang sugdan na sa pagpaniid sa militar ug kapolisan kay labing seguro tua ning kapusta sa mga rebeldi.

Kay kon seryoso pa sila sa ilang pag-alagad sa katawhan, way rason nganong ilang balibaran ang pagdapit sa kagamhanan sa probinsiya aron sila mahatagan og mga hinabang.

Sama pananglit sa pagpa-enroll sa mga kabus nilang mga molopyo sa libreng health insurance pinaagi sa Philhealth. Apan naglibog ko nganong duna pa gihapoy mga mayor nga wa mosuporta niini nga unta kaayohan man kini sa ilang mga molopyo.

* * *

Ilusad ugmang adlawa sa Partido Demokratiko-Sosyalista ng Pilipinas ang usa ka nasudnong kampanya pagbungkag sa Senado tungod kay wa kini'y hinungdan ug nag-usik-usik lang sa kwarta sa gobyerno.

Ang PDSP nga gipangulohan ni National Security Adviser Norberto Gonzales anhi molusad sa maong kalihukan sa Sugbo. Klarong politika ang nagpaluyo sa maong lakang tungod sa kasinatian ni Gonzales sa mga sakop sa Senado sa dihang siya gipabilanggo sunod sa pipila ka semana tungod sa pagdumili niya pagtug-an sa komitiba ni Senador Joker Arroyo kon kinsa ang mga donors sa pagsud niya og kontrata sa usa ka lobby firm didto sa gawas sa nasud.

Pero bisan kon dunay personal interest nga nagpahipi sa maong lakang, apan uyon ko niini. Tinuod nga inutil ug way kapuslanan ang Senado.

Hinuon naghatag lang kini og kasamok sa legislative department ug nag-usik-usik sa kwarta sa gobyerno.

Ang pagpunay og himo ug mga imbestigasyon sa mga senador nga kunohay "in aid of legislation" maoy usa sa nakatampo sa pagkabangkarota sa panudlanan sa atong gobyerno. Maayo unta og duna gyuy klarong resulta ang ilang mga imbistigasyon, apan ang nahitabo tataw nga gigamit lang sa mga senador ang paghimo og mga imbistigasyon pagpanggukod sa ilang mga kontra sa politika ug sa pagpasikat atubangan sa telebisyon.

Maklaro kini sa ilang performance. Tiaw mo nga sukad sa Hulyo sa miaging tuig hangtud sa Hunyo karong tuiga upat lang ka mga balaud ang ilang napasar apan migasto sila og P4 ka bilyon.

Di lang kay kini ra, ang ilang performance report card sa tuig 2003 nagpakita nga zero performance ang senado. Buot ipasabot way bisan usa ka balaud sila nga napasar.

* * *

[email protected]