Kaila kuno

Daghang mga Pilipino nga atua manarbaho sa gawas sa nasod. Ikaw tingaling nagbasa niini posibleng aduna usab ing kabanay nga atua mangitag panginabuhian sa langyaw'ng lapyahan. Kon mao, basaha kini aron ka makabantay niining usa ka modus operandi nga nauso pag-ayo karong panahona.

Maoy paboritong biktimahon sa mga suspek ang mga kabanay sa mga OFW. Ayaw na lang kahibulong kon nganong nasayod sila nga may paryente ka nga atua sa abroad. Tungod kay mao man kini ang ilang trabaho--ang pagpangilad -- anad silang mangispiya sa tawo o mga tawo nga buot nilang biktimahon.

Ang estilo mao nga motaak ang mga suspek sa mga lugar nga walay nakaila kanila diin ilang nasayran nga may mga residente nga adunay kabanay nga atua sa abroad.

Pananglit, aduna kay kabanay nga atua sa abroad. Kon ikaw ang makursonadahan sa mga suspek, makugang ka na lang kay usa ka adlaw niana, may manuktok sa imong balay. Magpaila sila nga kaila o kaha kauban sa trabaho sa imong kabanay (anak o asawa) nga atua sa abroad.

Magpatuo ang mga suspek nga ang imong kabanay maoy naghatag kanila sa imong address tungod kay may mahinungdanon kining mensahe nga ipaabot kanimo. Magdrama pa ang mga suspek hinungdan nga makatuo ka gyod. Patuohon kang lisod ang kahimtang sa imong kabanay didto sa abroad ug sila lamang ang makatabang.

Sa kadugayan, pangayoan ka na nila og kuwarta o kaha alahas. Human makuha ang ilang tuyo, mosibat sila ug dili na gayod magpakita kanimo. Mobalhin na usab sila sa laing dapit diin walay nakaila kanila ug adto na usab sila mopasalir sa ilang tinonto.

Sumala sa Kabalikat Civicom nga maoy naghatag niining maong pahimangno ug kasayoran, daghan nay nabiktima niining maong estilo sa tinonto didto sa Luzon area, partikular na sa probinsiya sa Tarlac. Magbantay kita kay basin makaabot usab kini dinhi sa Sugbo.

* * *

(Sumbong ug reklamo? Text sa 0910-8105522. E-mail: [email protected].)