Diin gikan ang bilyones?

Ang ?6.7-bilyones nga mga transaksiyon sa bangko nilang Bise Presidente Sara Duterte ug sa iyang bana sa niaging 20 ka tuig, nga gi-report sa Anti-Money Laundering Council, wala mopasangil og krimen. Pero kinahanglan nga ablihan gihapon ang ilang bank accounts ug Income Tax Returns (ITRs).

Kay dako ang kang-a sa iyang statements of assets, liabilities and net worth (SALNs). Nga nideklarar nga wala siyay bisan usa ka dako nga kuwarta sa niaging unom ka tuig. Sa ato pa, ang iyang ?88.5 milyones sa 2025 pulos ra balay, yuta, ug sakyanan.

Kon wala siyay nangalisbo nga mga sekreto, makatabang ni VP Sara kon hukman sa mayoriya sa 21 ka senator-judges ugma, Lunes, Hulyo 20, nga i-supina aron maablihan ang gilista sa House panel of prosecutors nga siyam nila ka bank accounts sa Metro Manila ug Davao City ug ITRs.

Kay kon tumanon ang pasidaan sa iyang mga abogado nga magpalaban sa Korte Suprema mosamot ang pagduda sa publiko nga namakak si VP Sara sa iyang SALNs. Nga mao sab ang nakapa-konbikto ni anhing chief justice Renato Corona.

Dili maglisod ang senator-judges, gawas kon manglawgaw na sab ang managsuong Alan ug Pia Cayetano, sa ilang desisyon. Igo lang nilang ipatigbabaw ang gihimo sa nangaging impeachment courts nga:

•Ni-abli niadtong 2001 sa bank accounts ni kanhi presidente Joseph Estrada; ug

•Ni-abli niadtong 2012 sa bank accounts ni Corona (kay wala tagda sa Korte Suprema ang iyang gipangayo nga Temporary Restraining Order) ug iyang ITRs (nga gitugotan ni anhing presidente Noynoy Aquino).

Mas maayo pang mangandam si VP Sara sa pagtubag sa mosunod nga mga pangutana kon maablihan nang iyang bank accounts ug ITRS:

•Diin man gikan ang binilyon ka pesos nga mga deposito --suweldo, dibidendo, ginansiya sa negosyo, gasa, o kuwarta sa ubang mga tawo (hinaot dili drug lords ug smugglers)?

•Diin man padulong ang kuwarta --gibalhin sa ubang bank accounts, gipalit og yuta ug kabtangan, o gi-encash?

•Nganong wala ma-apil sa iyang SALNs sukad sa 2007 (dihang Davao City vice mayor pa)?

•Nitakdo ba sa ilang gideklarar nga income ug sa ilang gibayran nga income taxes ngadto sa Bureau of Internal Revenue?