Di na kaayo hilom nga gubat
Ang mga pasidaan ni Presidente Ferdinand Marcos Jr. batok sa mga puwersang nga gustong mopukan sa iyang administrasyon atol sa iyang pagbisita sa mga kampo sa militar mahubad sa duha ka paagi:
• Una, nga inanay nang nakakuha og suporta ang kampanya ni kanhi presidente Rodrigo Duterte pagkumbinser sa kasundalohan pagbakwi sa ilang suporta sa administrasyon; o
• Ikaduha, nahuman nang pa-goryo-goryo sa Malacañang sa tinuod nga kahimtang sa ilang relasyon sa mga Duterte ug gipahibawo ang mga retiradong heneral nga nagpaluyo sa kanhi presidente nga bistado na ang ilang mga baraha.
***
Ang mosunod nga mga buwan mahimong susama ra gihapon sa nangagi. Magsinukliay og mga mensahe ang mga Marcos ug mga Duterte pero mas klaro na kay sa naandan nila nga mga pasumbingay. Magpabilin si Bise Presidente Sara Duterte Carpio sa Gabinete samtang magsige og balikas ang iyang amahan ug mga igsuon sa administrasyon.
Magpadayon sab sa pagpabungul-bungol ang presidente sa mga bugal-bugal batok niya samtang hatagan sa hingpit nga kagawasan ang mga kongresista ni Speaker Martin Romualdez sa pagpangita og dugang mga paagi pag-apiki nilang Duterte ug mga alyado.
***
Tanang pamostura sa mga Marcos ug mga Duterte managsama og tumong: Pagdominar sa lokal ug nasudnong eleksiyon sa Mayo 12, 2025. Kon molapad ang mayoriya sa mga Marcos sa Senado, House ug mga probinsiya, siyudad, ug lungsod, mahipos nang mga Duterte.
Pero kon mas molig-on ang puwersa sa mga Duterte human sa eleksiyon, dayunon sa mga Marcos ang pagtiwas nila. Kon popular gihapong mga Duterte, doblehon sa mga Marcos ang mga maniobra pagpabilin sa gahom lapas sa 2028.
***
Mausab ang kamada kon dunay di kasarangan nga mga panghitabo. Sama pananglit sa aktuwal nang paglihok, human sa daghan na kaayong mga hudlat, sa mga dumadapig ni kanhi Presidente Duterte sa militar ug kapolisan.
O kon mapugos na si Marcos paggamit sa iyang alas. Nga mahimong mas sayon kon ang mohukom nang International Criminal Court (ICC) pagpadakop ni Duterte ug sa iyang mga sinugo sa laktod nga pinatyanay sa drug war. Lahi sa mga Duterte nga limitado ang kapilian, ang administrasyong Marcos makahulbot sa bisan unsa nilang baraha nga pakurat sa bisan unsang higayon.
- Latest
