Kadaogan, pero di pa
Nakagawas na sa prisohan si kanhi senador Leila de Lima. Nakasohan na si kanhi presidente Rodrigo Duterte. Napapas na ang ?650 milyones nga confidential funds ni Bise Presidente Sara Duterte Carpio.
Natapos na ang dul-an sa pito ka tuig nga pagkapriso ni De Lima. Kapin sa tuig human napupos ang unom ka tuig nga presidential immunity ni Duterte. Pila ka adlaw human napugos si Carpio sa pag-surender sa iyang gipamugos unta nga pribilehiyo sa paggasto nga way resibo og ?1.8 milyones kada adlaw sa 366 ka adlaw sa 2024.
* * *
Human sa unom ka tuig ug walo ka buwan, duna nay huwes nga nangisog paghukom nga taphaw ang mga ebidensiya nga bunga sa maniobra sa kanhi presidente ginamit ang kinatibuk-ang makinarya sa gobyerno pagpatagam ni De Lima.
Mapamatud-an na sab sa mga korte sa umaabot nga mga adlaw kon madutlan ba sa balaod ang kanhi presidente. Kinsaa, tungod ba kahay kay wa kapaningli sa laktod nga pag-ihaw sa 30,000 ka biktima sa gubat sa drugas, nahinayak og panghudlat og kongresista atol sa pag-aslom sa iyang relasyon sa Malacañang.
* * *
Ang kagawasan ni De Lima maoy bunga sa iyang determinasyon pagpanalipod sa iyang kaugalingon gikan sa way kinutoban nga pakauwaw ug pagpanggukod sa labing taas nga opisyal sa nasud. Si De Lima, nga mao ray isog nga nisusi sa mas nauna nga laktod nga pagpanghasi sa Davao Death Squad, karon gawasnon nang makapalig-on sa mga kaso batok ni Duterte.
Nga kon di gihapon lihukon sa lokal nga mga korte, mahimong tiwason sa pag-imbestigar sa International Criminal Court.
* * *
Temporaryo rang kagawasan ni De Lima tungod sa piyansa. Way klaro kanus-a mabasurang kataposan sa tulo niya ka kasong kriminal. Way klaro kanus-a mahusay ba sa korte ang kaso ni Kongresista France Castro batok ni Duterte. Samang way garantiya nga di molikoy ang Kongreso sa confidential funds.
Laing mga pahinumdom nga layo pang dag-anan: Magpabiling mga Marcos sa gahom lapas sa 2028 kon way makabaraw sa ilang pangilad; sa ato pa, padayong masabotahe ang mga kaso pagsakmit sa ilegal nilang katigayonan; ug segurong mabawo ang pagpaningil sa ?203.8 bilyones nilang utang sa buhis ug ubang mga krimen.
- Latest
