Inutil kay nagkatibuwaag

Sa pagtimaan sa bugtong nilang adlaw sa tibuok tuig, ang mga mamumuo sa Sugbo ug sa Pilipinas may kapanaminan sa kadako sa ilang tingog kon magkahiusa: Ang National Basketball Association Players Association nipasundayag sa talagsaon nilang kalig-on atubangan sa insulto batok sa mga itom ni Donald Sterling, ang gipalayas nang tag-iya sa Los Angeles Clippers.

Usa diay sa mga hinungdan nganong naaghat si NBA Commissioner Adam Silver pagpahamtang sa labing bug-at nga silot pag-ban ug pagmulta ni Sterling, gawas sa kamakauuwaw sa sulti ni Sterling, mao ang hudlat sa mga magduduwa pag-boykot sa tanang playoff games kon wa sila matagbaw sa hukom ni Silver.

***

Kon gisunod pa diay unta ni Silver si kanhi NBA commissioner David Stern nga naglubay-lubay lang sa nangaging mga atraso ni Sterling, wa untay bisan usa ka magduduwa nga mopakita sa tulo ka duwa sa unang hugna sa playoffs. Wa unta maka-abante ang Washington Wizards sa semifinals sa Eastern Conference nga nagpaabot na lang sa mananaog sa kulba-hinam nga series sa Indiana Pacers ug Atlanta Hawks.

Kon sama sa mga mamumuo dinhi sa ato nagkatibuwaag pang mga magduduwa sa NBA, wa unta kaabante ang Memphis Grizzlies batok sa Oklahoma City Thunder ug wa unta makabawi ang labing gihuwasan nga Los Angeles Clippers batok sa Golden State Warriors.

***

Bisan sa pasiunang kadaogan sa ilang panaghiusa, di pa molunga ang NBAPA. Gi-apura nila ang mga tag-iya sa laing 29 ka teams sa NBA sa pagpahigayon dayon og botasyon, kon mahimo karon dayong semanaha, aron paglaksi sa pagpanag-iya ni Sterling sa Clippers.

Ubos sa mga lagda, gikinahanglan ang pag-uyon sa ¾ nga mayoriya (22) sa mga tag-iya sa NBA teams pagpalagpot ni Sterling, ang NBA maoy mobanos sa pagduma hangtod nga mahalin ang Clippers ngadto sa bag-ong mga tag-iya. Nagkataas nang listahan sa mga interesado nga naglakip na nilang Earvin Magic Johnson, Floyd Mayweather Jr. ug Oscar De La Hoya.

***

Hinaot nga nakaamgo na ang mga anak sa singot sa Sugbo ug Pilipinas nga napakyas sila pagbatok sa kontraktuwalisasyon ug sa bangis nga paglansang sa ilang suholan ug mga benepisyo tungod sa ilang pagkatibuwaag. Kay nag-unay og tampokay sa bukubuko ang mga haligi sa ilang kahugpongan.

Nganong di man gyod magkahiusa ang mga haring gangis sa mga unyon? Tungod ba sa panagsungi sa ideyolohiya? O sa nagkatuiris nila nga personal nga mga interes? Kanus-a man mohunong ang mga sakop pagyangu-yango sa ilang kadagkoan nga igo lang nigamit sa lehitimong kawsa sa pamuo alang sa politikanhong katuyoan? Hangtod sa hangtod na ba lang nga tugotan sa mga mamumuo ang ilang mga pangu nga motumpi og katigayonan nga mas dako pa kay sa tinuod nga mga kapitalista?

***

Email: [email protected]