Sayop silang duha

Nasayop si Barangay Kapitan Mary Ann de los Santos sa Lahug, Cebu City sa iyang pasangil nga way proyekto nga gipasiugdahan si Mayor Tomas Osmeña sa iyang barangay.   Ang iyang lusot nga mahimong wa lang siya mahibawo sa mga proyekto sa mayor kay wa moagi sa iyang buhatan mahimong makaiban apan di hingpit nga makapapas sa iyang responsibilidad sa pagpakatap sa sayop nga kasayuran.

Apan di matulisok si de los Santos nga nibuko-buko sa mayor sa niaging eleksiyon pinaagi sa tago nga pagpakatap ngadto sa mga molupyo sa Lahug og mga suwat nga nagsubli sa pasangil.   Bukas nga giluwatan ni de los Santos ang pasangil, ug ambot nganong kalit lang nakalimot ang mayor nga kusganon na niyang gipanghimakak ang maong pasangil, bisan sa wa pa magsugod ang kampanya.

* * *

Ang sayop nga pangangkon ni de los Santos, ug uban niyang mga panaway sa liderato ni Osmeña ug sa BO-PK, gisalikway na sa mga Sugbuanon niadtong Mayo 14.   Pinaagi sa paghatag nila ni Osmeña og makabungog nga mayoriya ug lab-as nga tulo ka tuig nga termino hangtod sa 2010.  Ambot nganong gibuling-bulingan ni Osmeña ang iyang kadaogan ning wa kinahanglana nga pagpanggukod.

Nasuko ba siya nga, sa makausa pa, napilde na sab sa Lahug?   Nauwaw ba nga wa matinuod ang gipasalig nga labing menos 100,000 ka botos nga mayoriya batok ni de los Santos?  Nahimangod ba nga igo lang niangkon si de los Santos og kapildehan apan maisugon gihapong nagdumili pag-amen niya?

Bisan unsa pay hinungdan sa labing uwahi niyang pag-ulbo, way katungod si Osmeña pagsilot ug paghulga sa kaugmaon sa kabataan sa Lahug.

* * *

Malampuson ang Kapamilya Tree Planting sa bukiran sa Jaclupan, Talisay City niadtong Sabado.   Salamat sa mga sakyanan nga gipaggamit ni Talisay City Mayor Soc Fernandez, kapin sa 300 ka mga tigpaminaw sa DYAB Abante Bisaya ang nag-abot ug nagtinabangay pagtanom sa 3,000 ka lawngon sa nangka, chicos ug sambag nga giandam sa MCWD alang sa kabahin sa 65 ektaryas nilang luna nga maoy gisaligang tinubdan sa tubig sa Metro Cebu gikan sa habagatan.

Ang tree planting nibukas sa tibuok buwan nga kalihokan sa ika-12 nga sumad sa pagkatukod sa DYAB nga maoy pagsaulog sa kamanggihatagon, pagpasidungog sa pag-inunongay ug pagpalambo sa pagtinabangay sa mga Sugbuanon.

* * *

Mosunod nga mga kalihokan:

• Hunyo 9:  Kumbira sa Kapamilya sa TV Barn sa ABS-CBN Complex sa Jagobiao, Mandaue City;

• Hunyo 17:  Kapamilya Run Year 7 nga manukad ug matapos sa Sumilon Road sa Cebu Business Park;

• Hunyo 23:  Local Job Fair sa Cebu Chamber of Commerce and Industry (CCCI) ug Cebu City government; ug

• Hunyo 30:  Halad sa Kapamilya, ang piyesta sa mga pangalagad sa mga ahensiya sa kagamhanan ug pribadong sektor.

* * *

Email:[email protected]