Grade 7 student patay sa saksak ng kaklase sa iskul

MANILA, Philippines — Hindi na umabot pang buhay sa pagamutan ang isang grade 7 student makaraang saksakin ng kanyang kaklase sa loob mismo ng paaralan na pinapasukan nito, kahapon ng umaga sa Quezon City.

Kinilala ang nasawi na si Mohammad Abtani Alfhasi, 13, tubong-Jolo, Sulu at residente ng Basilan St., Salaam Compound, Brgy. Culiat, sa lungsod.

Nadakip naman sa follow-up operation ng pulisya ang suspek na kaklase ng biktima na 15-anyos, ng Cotabato St., Salaam Compound, ng nasabing barangay.

Base sa ulat, dakong alas-5:45 ng umaga nang maganap ang insidente sa Culiat High School, ng Brgy. Culiat.

Lumalabas sa imbestigasyon ng mga awtoridad na dati nang mayroong hindi pagkakaunawaan ang dalawa dahil sa selos na siyang sinisilip na dahilan upang saksakin ng suspek ang biktima. Sinubukan pang itakbo sa New Era General Hospital, pero dineklara itong dead on arrival.

Nakapiit na ang suspek at inihahanda ang kasong kakaharapin nito.