Taguig naglaan ng P15 milyong tulong sa Mindanao
MANILA, Philippines – Naglaan ang Pamahalaang Lungsod ng Taguig ng P15 milyong pondo bilang calamity assistance para sa mga lungsod at munisipalidad na tinamaan ng magkakasunod na lindol sa Mindanao.
Ipinasa ng Sangguniang Panglungsod kamakalawa ang resolusyon para sa pagpapalabas ng naturang pondo bilang pagtugon rin sa panawagan ni Pangulong Rodrigo Duterte na tumulong ang ibang lokal na pamahalaan sa Davao del Sur at North Cotabato na nagdeklara na ng “state of calamity”.
Nakasaad sa resolusyon na ipadadala ang tulong sa mga pinakamatinding tinamaan ng lindol tulad ng Lungsod ng Digos, Magsaysay, Bansalan, Sta. Cruz, Hagonoy, Kabilawan, Malalag, Matan-o, Padada, Sulop, Lungsod ng Kidapawan, Makilala, Magpet, M’lang, Tulunan, lalawigan ng North Cotabato at Davao del Sur.
Bukod dito, nag-alay din si Mayor Lino Cayetano ng dasal at pakikiramay para sa pamilya ng nasa 20 tao na nasawi sa lindol, sa mga nasugatan, at nawalan ng tahanan at ari-arian.
- Latest