Tulong ng mga may-ari ng negosyo sa Quezon City giit
MANILA, Philippines — Isang linggo bago ang naitakdang deadline para sa 60-day clearing operations, hiniling ng Transport and Traffic Management ng Quezon City ang tulong ng mga business establishments para maipagbawal ang illegal parking at obstructions sa kanilang mga istruktura.
Ayon kay Atty. Ariel Inton, hepe ng QC Task Force for Transport and Traffic Management, kailangan ng lokal na pamahalaan ang suporta ng mga private business establishments sa buong lunsod upang makatulong ng husto sa hangarin ng pamahalaang-lunsod ng Quezon City na mawalis ang mga gumagamit ng bangketa. Ang bangketa anya ay para sa mga pedestrians at hindi para gamiting illegal parking.
Anya, bilang pagtalima ng lokal na pamahalaan sa direktiba ni Pangulong Rodrigo Duterte na linisin ang mga public roads at sidewalks sa mga obstructions, may halos 90 percent na ng mga pangunahing lansangan, Mabuhay Lanes, at vital secondary roads ang nalinis na sa lunsod.
Hinikayat ni Inton ang mga business establishment owners na payuhan ang kanilang security guards kung paano ang tamang paglalagay ng mga customers, sa mga naitalagang parking areas. Ang mga security guards anya ang may dahilan kung bakit hindi naaayon sa tamang lugar ang paglalagay ng sasakyan ng kanilang mga customers.
- Latest