Lady prosecutor ng Ombudsman, pinatay sa QC
5-buwan na buntis
MANILA, Philippines — Patay ang isang piskal sa Office of the Ombudsman na limang buwang buntis matapos na pagsasaksakin ng hindi kilalang suspek sa loob ng kanyang sasakyan na nakaparada sa harap na isang lotto outlet sa Quezon City, kahapon ng umaga.
Ang biktima ay nakilalang si Atty. Madonna Joy Ednaco-Tanyag, Assistant Special Prosecutor ng Office of the Ombudsman na nakatira sa Starlight residence Starlight St., Rancho 3, Concepcion 2, Marikina City.
Sa imbestigasyon ng pulisya, nabatid na ang krimen ay naganap dakong alas-11:20 ng tanghali sa harapan ng lotto outlet na matatagpuan sa Visayas Avenue, Brgy. Vasra, Quezon City.
Ayon sa report, nasa loob ng kanyang kotse ang piskal nang lapitan ng salarin at walang sabi-sabing pinagsasaksak ito sa iba’t ibang parte ng katawan.
Nakalabas pa ng kotse ang biktima pero bumagsak na rin sa kalsada at nang makitang nakalugmok na ito ay mabilis na tumakbo papalayo sa crime scene ang suspek.
Habang ang piskal ay isinugod pa sa East Avenue Medical Center subalit idineklara itong dead-on-arrival dakong alas-12:04 ng tanghali.
Sa ngayon ay nagsasa-gawa pa ng masusing imbestigasyon ang mga tauhan ng Quezon City Police District (QCPD) Criminal Investigation and Detection Unit (CIDU) para mabatid ang motibo ng krimen at madakip ang salarin.
Noong nakalipas na May 11, 2018 ay pinatay din si Quezon City Deputy City prosecutor at Chief inquest Rogelio Velasco sa Don An-tonio St., Holy Spirit Drive, Brgy. Holy Spirit, Quezon City.
Hindi pa man nareresolba ang pagpatay kay Velasco ay pinatay naman si piskal Madonna Joy.
- Latest
