QC govt., SMC lumagda na sa MOA
500 drug surrenderees bibigyang hanapbuhay
MANILA, Philippines - Lumagda na kahapon sa isang memorandum of agreement (MOA) si Quezon City Vice Mayor Joy Belmonte at San Miguel Corporation Chief Finance Officer Raoul Romulo para mabigyan ng trabaho ang may 500 drug surrenderees sa lungsod sa isang simpleng seremonya sa QC hall.
Sinabi ni Belmonte na ang mabibigyan ng trabaho ay mula sa 8,558 o mula sa kabuuang 16,000 surrenderees ng lungsod. Walumput-walong porsiyento rito ay mga lalaki, 11.62 percent ay babae na mula 36 hanggang 40 years old. Anya 5,081 dito ay unemployed at 2,539 ay employed.
Binigyang diin ni Belmonte na kawalan ng trabaho ang pangunahing problema kaya’t natututong magdroga ang karamihan kayat minabuti nilang humanap ng mga private companies na handang maglaan ng hanapbuhay sa mga nagbabalik loob na drug surrenderees.
“Bukod po sa SMC na kakontrata ang EEI sa pagtatayo ng MRT 7 sa pagbibigay ng trabaho sa ating mga drug surrenderees, mayroon din po tayong iba pang private companies na kausap para magkatrabaho ang iba pang surrenderees, bukod pa sa ‘Tindahan ni Ate Joy Project’ para sa mga kababaihan”, dagdag ni Belmonte.
Kaugnay nito, sinabi naman ni Romulo na ang proyektong ito ni Belmonte ang kauna-unahang partnership ng kompanya sa LGU para matulungan ang mga drug surrenderees na gustong magbago at magkaroon ng trabaho.
Ayon pa kay Romulo, maaari pang madagdagan nila ang bilang ng mga surrenderees na mabibigyan nila ng hanapbuhay depende sa pangangailangan ng proyekto at maaari ring mairekomenda sa iba pang kompanyang nasa ilalim ng SMC.
Sinabi naman ni Permo Sarsoza ng EEI na sasalain din nila ang mga drug surenderees na irerekomenda ng QC Anti Illegal Drug and Abuse Advisory Council (QCADAAC) ni Belmonte para matiyak kung saan ilalagay na trabaho ang mga aplikante depende sa kanilang qualifications.
- Latest