70 bus ng Dela Rosa Transit, hindi pinabiyahe
MANILA, Philippines - Hindi muna makakabiyahe ang may 70 bus ng Dela Rosa Transit, matapos masangkot ang isang unit nito sa pagdagan sa isang kotse sa kahabaan ng EDSA sa may Muñoz noong nakaraang linggo.
Ayon kay Land Transportation Franchising and Regulatory Board (LTFRB) Chairman Winston Ginez, ito ay upang mabigyang daan muna ang naturang bus company na maisailalim sa roadworthiness inspection ang kanilang mga sasakyan.
Kahapon, napasimulan ang pagpapatigil sa pagpasada sa naturang mga bus nang puntahan ng inspection team ng LTFRB ang terminal ng Dela Rosa sa Biñan, Laguna para maisagawa ang naturang pagbusisi. Ang pagsasailalim sa roadworthiness test sa naturang mga sasakyan ay kasabay naman ng pagsasailalim sa mga driver ng Dela Rosa Transit sa drug test at safety driving seminar.
Kapag pumasa na ang mga bus sa roadworthiness test ay maaari na ulit maipasada ang 70 bus units.
Pero niliwanag ng LTFRB na patuloy namang nakasuspinde ng 30 araw ang operasyon ng limang bus unit ng Dela Rosa Transit na kasama sa franchise ng bus unit na nasangkot sa aksidente.
- Latest
