Dami ng krimen hindi na kaya Pasay City nagpasaklolo sa NCRPO

MANILA, Philippines - Dahil sa hindi na kayang malabanan ang dami ng krimen na nagaganap sa lungsod ng Pasay, mistulang nagpapasaklolo ngayon si Mayor Antonino Calixto sa National Capital Regional Police Office (NCRPO) sa pagdaragdag ng bilang ng pulis sa siyudad. Ito ay makaraang makasama ang Pasay-Baclaran-EDSA area sa mga limang “street crime hotspots” na tinukoy ng NCRPO sa Kamaynilaan.

Ikinatwiran ni Calixto na kasalukuyang nasa 1:1,800 umano ang “police to population ratio” ng puwersa ng kanilang pulisya na malayo sa ideal na 1:500 ratio.

“Crime remains to be a top concern in our City but we can only do so much with our present complement of police officers. We need to fill in the gaps to increase police presence, improve crime solution, lower the crime rate by 50%,” ani Calixto.

Pinagsabihan naman ni Calixto si Pasay Police chief, Senior Supt. Rodolfo Llorca na magpatupad ng mas “proactive crime plan” para sa seguridad hindi lang sa area sa may Baclaran kundi maging sa ibang lugar na talamak din ang krimen tulad ng sa Roxas Blvd. at sa Macapagal Avenue na sinasalakay ng mga karnaper, holdaper at Bukas Kotse.

Sa rekord ng Pasay Police, nasa 808 krimen ang naitala sa lungsod mula Enero hanggang Hunyo 2013.  Pinaalalahanan naman ng NCRPO kamakailan ang mga station commanders na huwag pekein o doktorin ang kanilang mga rekord ng krimen at accomplishments upang matiyak ang tunay na antas ng kriminalidad sa Metro Manila at makagawa ng angkop na solusyon.