SUV inararo ng tren: 3 kritikal
MANILA, Philippines - Umabot ng kalahating oras bago tuluyang nailabas mula sa nayuping sport utility vehicle (SUV) ang apat na miyembro ng isang pamilya, kabilang ang isang tabloid reporter, nang salpukin at kaladkarin ng isang tren ng Philippine National Railways (PNR) sa bahagi ng J. Abad Santos Avenue at Old Antipolo St., sa Tondo, Maynila, kahapon ng hapon.
Isinugod sa Metropo litan Medical Center ang mga biktimang kinilalang sina Eduardo Tabura, 49, adviser/field reporter ng Daily Balita; maybahay nitong si Dominga, 48; at anak nilang si Michael, 25, pawang residente ng #17 Bernadette st., 8th Avenue, Caloocan City bunga ng mga sugat at pasa na tinamo sa katawan. Pawang nasa malubhang kalagayan ang tatlo. Ligtas naman sa insidente ang isa pang anak na si Daniel Tabura.
Sa inisyal na imbestigasyon ni PO2 Sergio Macaraeg ng Manila Police District-Traffic Bureau, dakong ala-1 ng hapon nang maganap ang insidente sa panulukan ng nasabing mga kalye.
Sinabi ni Melanio Claveria, 25, signal man, pinahinto umano niya ang sasakyan ni Tabura na isang kulay berdeng Toyota Revo (WLS-527), na pa-north-bound habang ang tren ay paparating sa direksiyon ng Tutuban, nang hindi umano huminto si Eduardo, ang nagmamaneho.
Hindi umano napansin ng signal man na tumuloy ang kotse ng mga biktima habang nakatalikod siya at sumesenyas na huminto naman ang kabilang direksiyon ng paparating na mga sasakyan nang magulat siya sa nakalusot na sasakyan ng mga biktima, at pagsalpok ng rumaragasang tren na ikinapipi ng mga biktima at nakaladkad pa ng ilang metro.
Mabilis na rumesponde ang mga tauhan ng Philippine National Red Cross at traffic officer subalit nahirapan silang ilabas mula sa sasakyan ang pamilya ng biktima.
Patuloy pa rin ang isinasagawang imbestigasyon sa insidente.
- Latest
- Trending