Mall sa Pasay, naabo sa sunog

Daan-daang mga pa­sa­hero ang na-stranded, habang isang fire volunteer naman ang itinakbo sa pa­gamutan makaraang ka­pu­sin ito ng hininga sanhi ng makapal na usok nang lamunin ng apoy ang bu­ong apat na palapag na gusali ng Welcome Plaza Mall, kahapon ng mada­ling-araw sa Pasay City.

Habang isinusulat ang balitang ito, kahapon ng hapon ay patuloy pa ring nagliliyab ang apoy sa nasabing mall na nagsi­mulang masunog dakong alas-2 ng madaling-araw.

Batay sa ulat, nagsi­mula ang apoy sa main entrance 1 ng naturang mall.

Sa panayam naman sa security guard ng mall na si Inocensio Geroca, 35, una umano niyang napuna ang usok sa entrance 1 na nasa left wing ng Welcome Plaza Mall, dating Masa­gana Supermart na nasa tapat ng bagong tayong Pasay City Public Market, Taft Avenue, Pasay City. Kabilang sa natupok ang Puregold Supermarket.         

Pasado alas-3 ng ha­pon kahapon ay hindi pa rin ito tuluyang idinekla­rang “fire-out” ng mga pa­matay-sunog ang apoy, dahil naman sa ma­kapal na usok na luma­labas sa mall ay pansa­mantalang pina­tigil ng Light Rail Transit Authority (LRTA) ang biya­he ng  LRT-1 sa Baclaran, Liber­tad Station, Gil Puyat at mula Gil Puyat, Libertad Station hanggang Bacla­ran mula pa alas-7:20 ng umaga hanggang sa isinu­sulat ang balitang ito ka­hapon ng hapon. (Rose Tamayo-Tesoro)