3 kilabot na drug pushers tiklo

Tatlong matitinik na drug pusher na matagal nang pinaghahanap ng batas ang nadakip ng pulisya sa ilang magkakasunod na operasyon sa Mandaluyong City.

Nakilala ang mga suspek na nadakip na sina Rodolfo Concepcion, 32, alyas Roger Tisoy, ng Sto. Rosario Compound, Bgy. Plainview, Mandaluyong City; Dominador Dizon, 30; ng #248 Sto. Rosario st. ng naturang barangay at si Mila Rivera, 37, ng Bagong Bayan, Bacood, Sta. Mesa, Manila.

Unang naaresto ng Mandaluyong Police si Concepcion sa loob ng bahay nito matapos na i-serve ang warrant of arrest laban sa kanya matapos ang dalawang taon nitong pagtatago nang hindi ito sumipot sa pagdinig sa kanyang kaso noong 1999.

Naglalakad naman si Dizon sa kanilang lugar nang matunugan ang pagdating ng mga pulis. Isang kahon ang itinapon nito bago nanakbo ngunit nasakote rin ng mga pulis. Nakumpiska sa kahong itinapon ang may 35.11 gramo ng shabu.

Nadakip naman sa isang buy-bust operation si Rivera na dumadayo pa sa lungsod sa kanyang iligal na operasyon matapos na isang asset ang mag-tip ng operasyon nito. Nakumpiska sa kanya ang may .41 gramo ng shabu na kanyang ibinenta sa pulis na umaktong buyer. (Ulat ni Danilo Garcia)