Long distance relationship

Dear Tito Miguel ,

Ako diay si Yel, girl, 23 years old ug taga Barangay Labangon, Cebu City. Naay nanguyab nako karon, akong problema lang kay molarga naman gud siya sunod bulan sa laing nasud aron motrabaho. Unsay ma-suggest nimo nga pang-warm up aron maanad  or maka -adjust rako sa long distance relationship ? Nagplano man gud ko nga ako siyang sugton. Salamat  — Yel

Yel,

Ang pangutana dili pa kun unsaon nimo’g anad nga wala siya, kun dili kumpleto ba ka’g malipayon maski ikaw ra usa. Kun mao, way problema maski layo mong duha. Kay kun emotionally needy ug clingy ka, di ka matagbaw sa videocall. Basin paulion pa nimo siya sa di pa mahuman iyang kontrata.

Busa sa dili pa nimo siya sugton, siguroha imong kaugalingon. Kun selosa’g madudahon ka, ayaw sugta, inyong relasyon gubot pa sa lukot. Sige ka’g duda’g patagad. Kun secure ka sa imong kaugalingon ug siya kasaligan, mahimo nimo suwayan. Kay kun siya cheater, magbinuang gyud na maski unsaon nimo, maski kuyog pa mong duha.

Kay sa cheater duwa ra ang tanan, dili makonsensiya sa binuhatan. Masuko pa na’g masakitan ka, kay ngadto dili siya seryoso, busa ayaw sad seryosoha. Mao nay ilang pangatarungan, sukwahi sa imong sukod sa kamatinud-anon.

Salig kun siya tarong. Pero di gihapon nimo malikayan ang magduda tungod sa kalayo ninyo duha, syaro di gyud siya mag iring-iring sa lain? Ayaw padala sa imahinasyon kay malayo ka sa kamatuoran. Kun mahitabo gyud imong gikahadlokan, andam ba ka mopasaylo o kaya nimo siya biyaan?

Balikon ta, dili pa kun anad ka nga wala siya, apan kun unsa ka ma naa siya’g wala. Kun malipayon ug malinawon ka nga mag-inusara, sugta. Kun imong kalipay nag agad niya, ayaw na lang. Kun kamo layo, dili siya kalingawan nga imo sangpiton kun ikaw masulob-on. Tito Miguel

Magpatambag ka? Ipada kang Tito Miguel: 0998-581-5856