Sr. Sto. Niño nagmilagro

Pinangga ni Aryong ang iyang hinigugma nga si Rita. Unya hapit na ang ilang kasal. Ug pulos sila debuto ni Senyor Sto. Niño.

Pilay estorya nagkadayon gyud sila. Ug sa unang adlaw sa kasal nanuroy sila sa lungsod. Apan sa kalit lang naglumbaanay sa pagdagan ang mga tawo sa palibot sa nanag-away nga mga bandidong tulisan. Bang! Bang! Bang! Naigo si Rita sa saag nga mga bala. Unya daling gidala sa tambalanan nga naglunang sa dugo. Nibakho sa paghilak si Aryong.

"Nganong nahitabo man kini kanato, Rita....?"

"A-r-y-o-n-g, p-a-m-p-o sa a-t-o-n-g d-e-b-u-t-o S-r. S-a-n-t-o N-i-ñ-o!" ni Rita nga kutas na  pagginhawa.

Tuod, daling niadto si Aryong sa rebulto ni Senyor Santo Niño duol sa tambalanan. Nag-ampo siya nga piniyong ang mga mata.  Human sa pag-ampo gibuka niya ang mga mata. Nahaigpot si Aryong kay ang rebulto nawala sa nahimutangan. Ug iyang gibalik si Rita didto sa ward diin nitulo ang mga luha niini.

Unya may nasimhot si Aryong nga talagsaong kahumot nga karon pa niya masinati. Dangta'g pipila ka minutos nahitiurok si Aryong, kay may anino siyang  nakita nga nihikap sa balatian ni Rita. Ug ang tag-iya sa anino nilakaw lang sab dayon. Iyang gisundan ang anino asa kini paingon. Ug didto padulong sa nawala nga rebulto nga iyang giampoan.

Apan sa kalit lang ningsiga ang mga mata ni Aryong, kay ang anino nahimong rebulto ni Senyor Santo Niño nga giampoan kaganina. Nakapanguros si Aryong sa iyang nakita. Daling giadto ni Aryong si Rita sa ward. Ug dili siya makatuo sa hitabo, usa ka milagro, kay si Rita naayo na ang samad sa saag nga mga bala.

"Pagkabuotan nimo, Senyor Santo Niño, nga giayo ang akong balatian!" ni Rita. "Sa imong gibuhat matag pista sa siyudad sa Sugbo moduaw ako kanimo aron mo sinulog..!" Unya niabot ang iyang mga ginikanan nga sila si Edwin ug Rowena uban usab sa ilang higala nga sila si Romeo, Kevin ug Christine nga nagpasalamat sa milagro ni Sr. Santo Niño. (Kataposan)