Ang patay’ng kahoy
Hoy, mga bata ayaw mo dinhi pagduwa ilawom sa patay’ng kahoy nga Talisay kay taw-an ra ba na diha,” gibadlong ni Ingko Simeon ang mga bata.
Patay na kining maong kahoy ug wala g’yuy mipasipala og putol niini aron kahoyon kay matud pa, kutob sa moanha diha nga magdala’g atsa takulahaw lang duklon ang ulo.
Si Mirok, ang mamumutol og kahoy sa Sityo Magbunga, gidukol diha nga iya na unta nga atsahon ang punoan sa patay’ng kahoy.
Mibutoy gud ang ulo ni Mirok dapit sa iyang alimpulohan. Daghan pa nga buot moputol apan mao lagi dunay modukol ug dili ra ba makita.
Unya usa ka gabii nga bulanon, may usa ka guwapa nga babaye nga nagpakita kang Ruben, anak nila ni Talina-Rufo nga dunay tindahan sa tuba sa eskina.
Kay guwapa lagi, wala kapugngi ni Ruben nga naibog siya ug sa ngadto-ngadto, nahigugma siya sa babaye nga nagpaila nga si Cristal.
“Ruben, kun imo ko nga gihigugma kuyog nako, ako tika nga ipaila nila ni mama ug papa nako,” matud ni Cristal.
“Oo, mokuyog ko nimo. Kanus-a ko nimo dad-a Cristal?” ni Ruben nga mibalikos sa iyang tuong bukton sa hawak sa dalaga. Hayag ang bulan ug nindot kaayo ang dan-ag niini nga miigo sa patay’ng kahoy.
“Kining patay’ng kahoy mao ni ang among gate o dakong pultahan paingon pa sa among siyudad,” ni Cristal.
“Siyudad?” miiknat ang kilay ni Ruben.
“Oo, among siyudad. Nindot kaayo ang among siyudad, Ruben.”
Tuod, gidala ni Cristal si Ruben didto sa ilang siyudad. Daw damgo lang alang kang Ruben diha nga nakasulod siya sa siyudad sa mga engkanto, ug misamot ang iyang gugma kang Cristal.
Usa ka hapon, may grupo sa mga tawo nga buot moputol sa patay’ng kahoy ug gibadlong sila ni Ruben. Ilang gikulata si Ruben apan may milaban kaniya ug ang mga mangangahoy nanglumba sa pagpanagan.
Unya, usa ka adlaw kalit lang nahanaw si Ruben ug sila si Talina ug Rufo nahimong adunahan sa ilang dapit ug sila na ang dangpanan o hulamanan og kuwarta ug bisa’g unsa basta gikinahanglan sa mga silingan. Ug ang patay’ng kahoy nagpabilin nga nagbarug sa may tampi sa lugot. (Kataposan)
- Latest
