Bar dancer Gula 6

 Wala makaharong pagtan-aw si Philip kang Emerald. Nauwaw kaayo siya nga nasayran nga may relasyon diay sila ug ang ig-agaw niini nga si Joan – ang kanhi dancer sa Wild Orchids Bar.

“Si Philip diay ang giingon nimo gaw nga maoy rason nga dili ka na gusto nga mopadayon pagsayaw sa bar?” matud ni Emerald. Igo lang miyango si Joan nga mipahiyom. “Oki ra uy, miagi na to. Walay problema kun kamo ang magdayon gaw,” matud ni Joan.

“Dili uy, dili ko mangilog og kalipay sa akong ig-agaw. Tambag nako ninyo nga inyong dugtongon pagbalik ang naputol ninyo nga pagminahalay,” giingnan ni Emerald sila si Joan ug Philip.

Mitutok si Philip kang Joan. Nakasabot siya nga dili na gayud mosugot pa kaniya si Emerald. Nahuna-huna ni Philip nga dalaygon diay kaayo si Joan nga gusto  na nga magbag-o.

“Mahimo ba nga tumanan nato si Emerald nga balikon nato ang atong pagminahalay Joan?” matud ni Philip sa hinay’ng tingog. Mipahiyom si Joan nga mitutok ni Philip.

“Ayaw na Philip, nalingaw na kaayo ko karon sa akong negosyo. Pangita na lang og laing babaye nga mohatag kanimo og tinuod nga pagmahal. Nakat-on na unta ko sa pagmahal kanimo apan tungod sa imong paglubad anam-anam nga namatay ang akong gugma kanimo,” prangka kaayo si Joan.

Mora’g tamparos ngadto ni Philip ang mga pulong ni Joan nga iyang nadungog. Nanglipaghong ang iyang panagway. “Sige, pag-ayo-ayo sa imong kinabuhi Joan. Mobiya na lang ko Emerald ug salamat sa maayo nimo nga pag-abi-abi nako,” matud ni Philip.

Dihang nakabiya na sila si Philip ug Randy, nagsultihanay ang mag-agaw nga Emerald ug Joan. “Mianhi ko gaw aron pahibaw-on si Tiyo nga kusog kaayo ang paglambo sa akong negosyo sa Carbon. Magpasalamat ko ni Tiyo nga gitabangan ko niya nga mausab sa akong pagkatawo,” ni Joan pa.

Nalipay si Emerald nga nasayud nga malampuson ang negosyo ni Joan. “Unya, dili na ba g’yud mahimo nga magbalik kamo si Philip gaw?” gisukna pag-usab ni Emerald ang iyang ig-agaw.

“Dili na g’yud gaw. Gusto nako nga tudloan og leksyon si Philip nga bisan bar dancer lang ako kaniadto apan makamao ako nga mobarug aron manginabuhi nga disente,” pintok nga tubag ni Joan.

Milabay pa ang mga buwan, misamot ang paglambo sa negosyo ni Joan. Duna na usab siya’y tindahan nga wholesaler og mga bugas. Usa ka higayon, nagpaloap si Joan sa iyang business permit sa City Hall.

Wala tuyoa nga nakit-an ni Joan si Philip nga apil sa mga reporters nga mi-interview sa city treasurer. Igo na lang mipahiyom si Joan nga naglantaw sa kanhi niya boyfriend. - Kataposan