Si Bulakna, si Lapulapu ug si Magellan

Gisungasong nila ni Magellan ug mga kauban ang naghaguros nga unos nga mikusokuso sa giluwanan nilang Gallon ug sa paglurang maoy ilang namatngonan nga gipadpad sila sa Sugbo ug gisugat kini sa tumang kamaabiabihon ni Raja Humabon diin usab gihimo gilayon ang unang pagbunyag isip mga bag-ong Kristiyanos.

Human sa pagpamahaw maoy gihimo ni Magellan ang pagsakay og balik sa ilang Gallon sa pag-aninaw sa palibot ug mitadlas kini sa Mactan Channel hangtod nga nahidangat sila sa atbang sa Isla sa Mactan. 

Nagdali sa pagtambo sa bintana sa giluwanan nilang Gallon si Magellan sa pag-aninaw sa kahimtang sa kadagatan ug wala lamang damha nga maoy nasawod sa iyang panan-aw ang usa ka babaye nga nagtiniil lamang nga naglakaw sa baybayon.

Naghambin og talagsaong kaanyag ang maong babaye ug ang nagdunghay niining buhok nga mulabyog sa matag huros sa huyohoy sa sayong kabuntagon daw nakapatiurok kang Magellan sa pagsud-ong hangtod nga wala lamang niya  damha ang pagpanguyamang sa gibati niining kahidlaw.

Cyrusss!!!” sampit ni Magellan sa iyang mensahero. “Cyrusss!!!” “Talahuron,” tubag ni Cyrus kang Magellan sa pagsampit niini kaniya. “Unsay sugo mo kanako Senyor?”

“Hala,” ni Magellan pa. “Adtoa kanang babaye nga naglakaw sa baybayon ug dad-a dinhi sa akong atubangan.”

“Matuman talahuron,” tubag sa mensahero nga mikarag sa pagpaingon sa nahimutangan sa maong babaye. Dihang giduol sa mensahero ang maong babaye dali usab nga nahiabot si Lapulapu ug mga sakop nga maoy gisugat niini ang mga bangkaw nga gition ngadto kaniya.

“Kinsa ka ug unsay tuyo mo niining among isla?” midahunog ang dakong tingog ni Lapulapu nga nangutana sa mensahero. “Kinsa ka, tubagg!!”

“S-si, Cyrus ko, Senyor,” nagkurog nga mitubag ang mensahero. “G-gisugo ko sa among pangulo nga si Ferdinand Magellan nga kuhaon ko kanang babaye ug akong dad-on sa iyang atubangan.”

“Unsa,” ni Lapulapu pa nga miibot sa nagpangidlap sa kahait sa gitakin niining sundang. “Dad-on mo sa iyang atubangan si Bulakna nga akong asawa?”

“A-ha?” daw misamot ang gibating kahadlok sa mensahero.”A-asawa diay na nimo, Nyor?”

“O-o, akong asawa si Bulakna ug si bisan kinsa nga mangahas sa pagpanamas-tamas kaniya,” giisa ni Lapulapu iyang sundang. “Matabastabas ang kalawasan niining akong sundang.”

Nagdali sa pagbiya ang mensahero ug mibalik kini sa Gallon sa pagtaho sa maong hitabo ngadto kang Magellan.

“Unsa?” daw misinta sa kapungot si Magellan. “Asawa diay nianang dako’g lawas nga nagbahag nga lalaki ang maong babaye ug gipugngan ka nga madala dinhi sa akong atubangan?”

“Mao na Nyor,” nagkanayon ang mensahero. Ug kun nakagusto kuno ka sa iyang asawa Nyor, gihagit ka niya og away sundang batok sundang ug bangkaw batok bangkaw.

“Kun mao,” ni Magellan pa nga mitan-aw sa iyang mga sakop. “Pangandam kamo kay atong sulngon ang maong isla ug hutdon sa pagpatay ang mga nagbahag nga mga lalaki.”

Ug tuod man nagdungan sa pagpangambak ang mga sakop ni Magellan ug nagdagan kini sa pagsulong sa isla sa Mactan nga nakaingon sa pagpasad sa daghan mga patay nga miligdas sa baybayon sa Mactan.

“Salbahis ka, nagpangagot ang ngipon ni Magellan nga nakigharong kang Lapulapu. “Gusto ka diay nga makatilaw sa akong kabangis?”

Gitigbas ug gitigbas ni Magellan si Lapulapu apan abtik kining miikid sa paglikay sa pagtigbas ni Magellan.

“Mapangahason ka,” ni Lapulapu pa nga nagpadayon sa iyang pag-ikid sa paglikay sa tigbas ni Magellan. “Gitugaw mo ang kamalinawon dinhi sa isla busa dawata kining akong tigbas!

Gilikayan ni Magellan ang nagsunodsunod nga tigbas ni Lapulapu hangtod nga naigo ang tuhod nga maoy nakaingon sa iyang pagluhod.

Gisundan pa ni Lapulapu ang daghang pagtigbas nga nakapahagba kang Magellan sa tubig ug namatay ug iyang mga sakop nahibiling buhi nga gibati og hilabihang kahadlok naglumba sa pagpanagan sa pagbalik og sakay sa ilang Gallon ug misibat pahilayo. (Katapusan)