Anino sa kulto - GULA 107

“Moabot ra kanang higayona kun magkatagbo na gayod ang inyong mga dalan.”

“Balikan nato ang bahin sa bata nga gikidnap, Dick,” ni Carlo pa nga nakamatikod sa taudtaod na nga pagkahitipas sa ilang hilisgotan. Taudtaod na ang ilang panagsulti. Imbes mag-apas sila sa panahon sa pagpangita sa bata nga gidagit, nalangan na hinuon sila sa paghisgot bahin sa supremo sa Tambayawan Black Brotherhood.

“Tuod, Carlo,” sa hepe pa usab. “Mag-iyahay kita’g pangita sa bata. Magkontakay lang unya kita kun aduna nay mga development.”

“Areglado, Dick,” ni Carlo.

Tibuok adlaw nga nangita si Carlo ug ang kapolisan sa bata nga gidagit. Apan kabawo ang ilang naani. Ang bata nahisama sa dagom nga gilabay taliwala sa bagang dagami. Nasubo si Carlo sa naangkon nilang kapakyasan. Mipakita usab og kahisagmuyo si Maj. Campo sa nahimong linugdangan sa ilang lakaw.

Bisan pa man sa nahiagomang kapakyasan, ang mga awtoridad wala moangka. Nagpili si Maj. Campo og pipila sa mga sakop niini nga maoy mopadayon sa pagpangita sa bata nianang pagka-gabii. Si Lt. Valera ang nangulo kanila. Wala sila magpakawala sa paglaom nga makit-an nila ang bata.

Si Carlo ug Maj. Campo nanihapon sa restawran atbang sa police headquarters. Human makapangaon, mibalik dayon sila sa buhatan. Naghulat ang hepe og tawag gikan kang Lt. Valera.

Samtang naghulat nga mobagting ang telepono, nagkulukabildo sila. Mao ray ilang gihisgotan ang bahin sa mga krimen nga nahitabo sa Mabini. Misugilon ang hepe nga nakadawat na kini’g kasaba gikan sa mayor. Nasuko na ang mayor nga wala masulbad ang sunodsunod nga mga krimen nga nahitabo sa Mabini.

Ingon sa nabalaka ang hepe nga basin marelibohan siya isip hepe sa kapolisan sa Mabini. -- Sumpayan pa