Ang tawo sa kawayanan

Matahom si Rowena, medyo pution ang pamanit, taas ug may pagkabuwagaw ang buhok. May porma sab ang iyang lawas nga nakadugang sa iyang pagkamadanihon sa mga lalaki sa ilang dapit sa barangay Buhisan.

Nagpangidaron na siyag 30 anyos ug tungod sa iyang pagkapilian, wa pay nakadama sa mga nangulitawo niya.

"Grabeha sab nimo Wen, wa pa gihapon kay nagustohan sa mga naninguha nimo?" sukot ni Pina usa ka adlaw niana sa dihang nagkaabot sila sa sapa aron manglaba.

"Ay da, wa man sad ko magdali, Pin. Naay mga namisita sa balay nga maayog panagway, pero way sud ang bulsa, ang uban kanila mag-uuma. Ay na lang ta." Tubag ni Rowena.

Nanglabay ang mga adlaw ug wa gihapoy gisugot ang dalaga sa mga naninguha niya.

Usa ka hapon niana, samtang nanilhig si Rowena sa ilang tugkaran, usa ka hamtong ug mestisohon nga lalaki ang kalit nga mibutho sa iyang luyo.

"Maayong hapon kanimo, Inday," pangatahoran sa bisita ni Rowena nga wa niya damha ug di kaila.

"Oy, sir, maayong hapon sab nimo. Unsay ato, sir?" sa dalaga pa nga nakuratan nga milingi sa iyang luyo.

"Ako si Rizo. Gusto lang kong makighimamat nimo kay pareho kag nawong ug bayhon sa akong anak nga nahilayo na nako human siya maminyo ug gida sa iyang bana sa layong dapit," matud sa bisita ni Rowena nga milakra sa nawong niini ang kasubo.

"Rowena ang akong pangalan, sir. Asa man diay ka nagpuyo, sir?" sukot sa dalaga.

"Naa ra nianang luyo sa kawayanan sa unahan. Sige Wen, dili na lang ko magdugay. Magkita unya ta sa sunod higayon," tubag sa lalaki nga di pa sinati sa dalaga ug estranyo pa sa iyang panan-aw.

"Naa kuno siya magpuyo luyo sa kawayanan pero wa may balay dihang dapita?" nakapangutana si Rowena sa iyang kaugalingon samtang nagtan-aw sa lalaki nga naglakaw subay sa dan-dan paingon sa kawayanan.

Nanglabay ang mga adlaw ug padayong magduawan ang mesteryosong tawo kang Rowena. Ang nahibudngan sa mga higala sa dalaga kay wa silay makitang kauban niini samtang nakigsulti siya sa nagpailang si Rizo nga sagad anha sa tugkaran sa ilang balay.

Usa ka higayon niana, mao na lay ilang nadunggan gikan sa dalaga nga aduna kunoy tawo nga gustong moda kaniya sa laing lugar. Gikaguol kaayo kini sa iyang mga ginikanan ug misulay pagda kaniya sa doktor ug arbularyo apan way maayong resulta.

Magpangyawyaw na kanunay si Rowena bahin sa mesteryosong tawo nga modala kuno kaniya. Wa nay mamisita kaniya gumikan kay di man siya makaatiman sa iyang panglawas ug pangareglar sa iyang kaugalingon. Nahadlok usab sila sa mesteryosong lalaki nga nagtuo silang di sama kanato ug engkanto.

Hangtud nga usa ka adlaw niana, daw natulala na ang dalaga ug di na kini makigsulti ni bisan kinsa.

"Kalooy sab ni Rowena. Sa tanto niyang pili sa iyang mga maghahalad, napunta na hinoon siya sa di ingon nato," nakatuaw ang usa sa iyang mga higala samtang naglantaw sa dalaga nga naglingkod gawas sa ilang balay. (Kataposan)