Nagkainit nga Miss World pageant

Ang palarang nahimong Miss World "Beach Beauty" o Best in Swimwear karong tuiga mao si Miss Venezuela. Siya ang unang kandidata nga nahimutang ug deretsong nahimong semi-finalist ug may kahigayonang makakuha sa maong titulo sa umaabot nga koronasyon karong buwana. Kauban niya sa Top 5 mao sila si Miss Angola, Miss Czech Republic, Miss India ug Miss Singapore. Ang atong pambato sa Pilipinas nga si Binibining Pilipinas World 2006 Anna Maris Igpit ang usa sa nahimutang sa Top 25 slots sa Miss World "Beach Beauty" competition.

Ang labing unang nahimong "Miss World Beach Beauty" sa kasaysayan sa maong kompetisyon mao si Rosanna Davidson sa nasud sa Ireland niadtong tuig 2003, gisundan ni Nancy Randall sa nasud sa USA niadtong 2004, ug Yulia Ivanova sa nasud sa Russia.

Gipahigayon na sab karon sa Miss World Organization ang pormal nga "filming shows" sa mga kandidata sa tibuok kalibutan alang sa gipahigayong Miss World 2006 "Vote For Me Shows" didto sa Baltic Rievera resort sa Gdynia, Warsaw, Poland.

Usa sa highlight nga gipahigayong filming sa maong show sa mga kandidata karon mao ang pagbisita ug pagsuroy sa Dar Pamorza sa Gdynia Harbour ug sa Malbork Castle ug fun trip sa Aqua Park sa silingang Sopot didto sa Poland. Mibisita pud sila sa lokal nga tulonghaan sa Gdynia, Poland alang sa pormal nga inagurasyon sa Miss World International Library. Ang mga kandidata sa Miss World midonar og mga libreng libro ngadto sa mga estudyante sa maong tulonghaan sa gipahigayong 'special lessons' sa mga kandidata ngadto nila.

Ang tanang mga kandidata sa Miss World 2006 gitagaan og oportunidad ug kahigayonan nga makasulod sa Top 16 sa maong kompetisyon pinaagi sa upat ka "fast-track" events: Miss World Beachwear, Miss World Sportswoman, Miss World Miss Talent, Miss World 'Beauty with a purpose' ug duha ka 'semi-finalists' kada continental zone nga gibase sa pagpili sa public voting ug sa mga hurado.