Hagit sa "Sandwich"

Nahugyaw ang Dominggo sa SM Fiesta Strip human mitekang ang naila na nga banda sa kauluhan nga gitawag ug "Sandwich" aron paambitan ang labing bag-o nila nga album. Kini mao ang ilang fourth album nga nahimugso karon nga naa na sila sa ika walo nga tuig sa ilang pagpanimpad sa natad sa musika. Taod-taod na usab nga gikagubtan didto sa kauluhan ang maong banda tungod kay tiaw mo ba nga walo na diay sila katuig nga mipaambit sa ilang musika. Ang alegre mao nga ang lima ka mga sakop niini nga sila si Raymund Marasigan (vocals and guitars), Diego Castillo (guitars), Mike Dizon (drums), Myrene Academia (bass) ug Mong Alcaraz (guitars) mga myembro sa nagkalain laing rock bands sa kauluhan.

" I know it's a scheduling nightmare. But it's the music that counts," dali nga pasabot ni Raymund sa dihang nahinabi sa Banat Hugyaw niadtong Domingo sa gabii. Si Marasigan sakop sa Eraserheads, Cambio ug Pedicab, si Diego ug Mike miyembro sa Teeth ug Pedicab, si Myrene sa Imago ug si Mong sa Chicosci. Matud ni Raymund nga bisan pa man niini nagkasinabot ra gihapon sila diin nakat-on ra sila pagpangita ug lusot kon ugaling dunay mga babag sa schedule sa matag miyembro.

Five on the floor- kini maoy titulo sa labing bag-o nila nga album. Aduna kini dose ka mga kanta nga gipahaum sa inadlaw-adlaw nga kasinatian sa matag miyembro. Ang carrier single niini mao ang kanta nga "Sugod" nga matud pa ni Raymund naghulagway sa pagbati ug sakripisyo sa usa ka tawo nga makigharong sa tanang babag aron lamang maduol sa ilang mga idolo sa higayon nga dunay mga concerts ug live performances." It's a tribute to Juan dela Cruz out there." Matud niya pinaagi sa maong kanta buot niyang ipahibawo nga nasayod ug nakasabot sila sa pagbati sa mga fans aron mahangop ang ilang mga idolo.

Gigama ubos sa EMI Philippines ang maong album maoy labing una nga gihimo sa Sandwich diha sa nahisgutan nga recording company human sila mipirma og kontrata niadtong December 2005. Kini naglakip sa mga kanta nga dunay titulo nga "Sunburn," DVDX, Photocopy, View Master, Walang Kadala Dala, In Case of Fire, Resbak, Goodnight January, Kalendaryo, Marikina ug Let Your Cellphone Shine." Niadtong Domingo matud ni Raymund nga ang kanta nga 'Sugod" maoy iyang paborito ilabi na sa dihang hinay-hinay na nga nagpunsisok ang mga tawo nga buot motan-aw sa ilang pasundayag didto sa fiesta strip.

Kumusta ang dagan sa ilang grupo sulod sa walo ka tuig? " Great. It's getting better. Matud pa niya nga hinay-hinay nila nga nakab-ot ang ilang gusto nga buhaton alang sa ilang musika. Duna usay bag-o sa ilang grupo ug kana mao ang pagpahisakop na ni Mong niadtong nakalabay nga tuig. Kini tungod kay matud pa ni Raymund sa dihang nagsugod pa lang ang "Sandwich" si Mark Abaya nga karon VJ sa MTV maoy orihinal nila nga singer apan gikinahanglan na niining manamilit sanglit puno na kaayo ang schedule niini. Ning labing bag-o nila nga album, dunay pakulo ang Sandwich. There are 12 stickers that correspond to every song." Buot ipasabot nga kon original copy ang inyong paliton duna kamoy makuha nga dose ka stickers nga nagkalain-lain ang disenyo nga gipahaum sa matag kanta. Matud ni Raymund simbolo kini sa ilang pasalamat nga dili pirated ang gipalit nga kopya.

Usa na lang ang gihandom karon sa Sandwich nga ilang matagamtam pag-abot sa tukmang panahon. " We have never performed abroad kaya sana ma-experience din naming yan," pong pa ni Raymund.

Nagtinguha usab si Raymund nga makagama siya og kanta nga binisaya. Gani matud pa niya nga duna na siyay natampo nga awit nga binisaya sa album sa Dice and K9 apan wala lang siya masayud unsay nahimo nga title niining maong kanta.

"We have friends in Cebu. It's a great place. I wish we could stay longer," pagpadayag pa ni Raymund. Suma pa niya dili lisod ang paggama og binisaya nga kanta sanglit manawag lang siya sa iyang mga amigo dinhi sa Sugbu aron binisay-on ang mga pulong nga iyang mauyonan nga gamiton alang sa usa ka kanta.

Duha ka hagit ang nag-bukal karon sa huna-huna sa mga miyembro sa Sandwich. Una mao nga makapasundayag sa gawas sa nasud ug ang ikaduha mao nga makagama og kanta nga lunlon binisaya agig pasidungog sa kanindot sa Sugbu ug sa ka maayong tawo sa mga Sugbuanon. Apan sanglit dili man sila mahadlok nga musuway og mga bag-ong butang ug kahigayonan dili halayo nga mabuntog ra nila ang maong mga hagit aron magmalampuson sila sa hingpit pag-abot sa tukmang panahon.