QCPD doble alerto na sa Undas

MANILA, Philippines — Isang araw bago ang Undas, mas pinaigting pa ni Quezon City Police District (QCPD) Director PBGen.Christopher Olazo, ang security deployment plan upang matiyak ang kaligtasan ng publiko  na dadalaw sa puntod ng kanilang mahal sa buhay.

Ayon kay Olazo, kabilang sa mga paghahanda ang pakikipag-ugnayan sa mga ahensiya ng pamahalaan at iba pang stakeholder, inspeksiyon sa mga transport hub, at pagsasagawa ng simulation exercise kaugnay ng kahina-hinalang bagaheng posibleng naglalaman ng pampasabog sa isang terminal ng bus.

Ilalagay ang mga pulis, katuwang ang mga force multiplier, sa mga sementeryo, columbarium, memorial park, terminal ng transportasyon, istasyon ng LRT at MRT, mall, pamilihan, simbahan at iba pang lugar na inaasahang dadagsain ng publiko. Magtatayo rin ng Police Assistance Desks upang magbigay ng tulong sa mga mamamayan, habang paiigtingin ang pagpapatrolya sa mga residential community upang maiwasan ang krimen at mabantayan ang mga bahay na maiiwang walang tao.

Pinaalalahanan ng QCPD ang publiko na sundin ang mga patakaran sa seguridad at mga alituntunin ng lokal na pamahalaan, kabilang ang mga pagbabawal sa pagdadala ng armas, matutulis na bagay, alak, sigarilyo, vape products, kagamitan sa pagsusugal, madaling magliyab na materyales, at malalakas na sound system sa mga lugar na saklaw ng naturang mga pagbabawal.