Bombang gagamitin sa EOR training sumabog: 2 PCG personnel sugatan

MANILA, Philippines — Dalawang miyembro ng Philippine Coast Guard (PCG) ang nasugatan makaraan ang aksidenteng pagsabog sa loob ng kanilang barracks sa Zamboanga City International Pier nitong Sabado ng gabi.
Sa ulat ng Zamboanga City Police, bandang alas-10:39 ng gabi ng mangyari ang insidente sa loob mismo ng barracks ng Explosive Ordnance Disposal Unit-Southwestern Mindanao sa compound ng Port Police sa kahabaan ng Corcuera Street sa Port Area dakong alas –10:39 ng gabi.
Ayon sa imbestigasyon, kasalukuyang naghahanda ang mga tauhan PCG para sa gaganaping Explosive Ordnance Reconnaissance Agent Training nang mangyari ang wala sa oras na pagsabog ng eksplosibong gagamitin sa pagtuturo.
Agad namang isinugod sa Ciudad Medical Hospital ang dalawang nasugatang PCG personnel para malapatan ng lunas.
Kaugnay nito, pinasubalian naman ng PCG Zamboanga ang mga espekulasyon na ang pagsabog ay posibleng kagagawan ng mga terorista.
Inihayag pa ng PCG na “isolated” lamang ang pangyayari sa routine handling ng mga eksplosibo at mga materyales na gagamitin sa pagsasanay.
Patuloy ang masusing imbestigasyon ng mga awtoridad sa insidente.
- Latest

















