P42 dugang sa minimum nga suweldo moepekto karon

CEBU, Philippines — Kapin sa 300,000 ka minimum wage earners sa Central Visayas, lakip ang Negros Oriental ug Siquijor, ang makabenepisyo sa P42 nga dugang sa inadlaw nga suweldo sugod karong adlawa, Miyerkules, Oktubre 14.

Gipatuman na sa National Wages and Productivity Commission (NWPC) ang pagpatuman sa wage adjustment.

Ubos sa bag-ong wage order, mosaka gikan sa P540 ngadto sa P582 ang minimum nga inadlaw nga suweldo sa Class A areas, lakip ang Expanded Metro Cebu. Sa Class B areas, mosaka kini gikan sa P500 ngadto sa P542.

Ang minimum nga binulang suweldo sa mga katabang o kasambahay sa Cebu, Bohol, Siquijor ug Negros Oriental mosaka usab og P500, gikan sa P7,000 ngadto sa P7,500.

Matud ni Labor Secretary Francis N. Tolentino, nagpadayon ang pagrepaso sa mga suweldo sa nagkalainlaing rehiyon subay sa direktiba ni Presidente Ferdinand Marcos Jr. nga palig-onon ang suweldo sa mga mamumuo.

Alang sa mamumuo nga nagtrabaho og 26 ka adlaw matag bulan, ang P42 nga dugang sa inadlaw nga sweldo moabot og P1,092 sa binulan nga basic wage.

Gipahinumdoman ni DOLE-7 regional director ug RTWPB-7 chairperson Emmanuel Ferrer ang mga kompanya ug mga employers nga sundon ang bag-ong minimum wage rates.

Ang mga mamumuo nga dili hatagan sa usbaw sa suholan mahimong moreklamo sa opisina sa DOLE-7 sa Gorordo Avenue, Cebu City.

Samtang, nangandam sad ang DOLE sa Sagip Trabaho program ubos sa TUPAD aron matabangan ang mga kwalipikadong micro, small and medium enterprises (MSMEs) nga naglisod sa pag-abaga sa dugang gasto sa suweldo.

Ang mga kwalipikadong negosyo mahimo usab nga mo-aplay alang sa exemption subay sa mga giya, sulod sa 75 ka adlaw gikan sa pagkaepektibo sa wage order.  IBM BANAT NEWS