Garganera ug Osmeña nagkasumpaki atol sa sesyon
CEBU, Philippines — Nagsumpaki sila si Konsehal Joel Garganera ug Bise Mayor Tomas Osmeña atol sa regular session kagahapon human naningil si Garganera sa bise mayor sa gisaad niini nga solusyon sa problema sa basura sa siyudad.
Sa iyang privilege speech, gipahinumduman ni Garganera si Osmeña nga niadtong Mayo 26 nihangyo ang bise mayor sa konseho og 60 ka adlaw aron maandam ang plano sa pagsulbad sa krisis sa basura sa siyudad.
Matud pa ni Garganera nga gihatagan na nila og igong panahon si Osmeña apan wala pa gihapo’y gipakita ang bise mayor bisan og nilabay na ang kapin sa upat ka buwan.
Gikwestiyon usab sa konsehal ang pamaagi sa siyudad sa pag-atubang sa problema sa basura diin gihulagway niini nga nagkatibulaag lang ang mga lakang ug walay klarong koordinasyon.
Samtang naghatag pa si Garganera sa iyang privilege speech kalit nga nitingog si Osmeña ug gilabay og papel si Garganera aron depensahan ang iyang kaugalingon.
Matud sa bise mayor nga nakasumite na siya sa iyang gisugyot nga solusyon apan nipadayon si Garganera sa pagpangutana kon nganong wala siya’y nadawat nga dokumento gikan sa opisina ni Osmeña.
Nisaka ang tingog ni Garganera tungod kay wala kini makauyon sa pagsamok ni Osmeña bisan og panahon pa niya nga mo estorya atubangan sa konseho.
Nitubag usab si Osmeña nga nahuman na niya ang iyang gisugyot nga programa alang sa pagsulbad sa problema sa basura ug ang pagpatuman niini anaa na sa kamot ni Mayor Nestor Archival.
Matud sa bise mayor nga ang iyang giandam nga programa gipetsahan niadtong Enero 29 nga nagkantidad og ?250 milyones. Gikwestiyon ni Osmeña ang laing proposal nga niabot na sa ?470 milyones tungod lang sa gidugang nga usa ka ekipo nga maoy hinungdan sa dakong pagsaka sa gasto.
“Something is wrong. The addition of one small piece of equipment has increased its cost. I smell an anomaly and the reputation of this council is at stake”, matud ni Osmeña. BDB BANAT NEWS
- Latest




















