DOLE: ‘Piso per parcel’ ni Rosmar, illegal
MANILA, Philippines — Ilegal umano ang “piso per parcel” na sistema ng bayaran na iniaalok ng social media personality at negosyanteng si Rosmar Tan sa mga gustong kumita sa pagbabalot ng mga parcel, ayon sa Department of Labor and Employment (DOLE).
Naglabas ng pahayag ang DOLE matapos magtanong ang law professor na si Josiah David Quising tungkol sa anunsiyo ni Rosmar sa Facebook noong Agosto, kung saan nag-alok siya ng trabaho sa pagbabalot ng parcel kapalit ng P1 bawat isa.
Ayon sa post ni Rosmar, maaaring kumita ng hanggang P10,000 kada araw ang makakabalot ng 10,000 parcel. Sinabi rin niyang kaya ng isang tao na magbalot ng 700 hanggang 1,000 parcel sa loob ng walong oras at kumita ng P700 hanggang P1,000.
Ipinaliwanag ng DOLE na sa ilalim ng Article 101 ng Labor Code, ang mga manggagawang binabayaran batay sa resulta o rami ng natatapos na trabaho, kabilang ang piecework, pakyaw at task basis, ay dapat tumanggap ng hindi bababa sa itinakdang minimum wage para sa normal na oras ng trabaho.
Ibig sabihin, kahit hindi umabot sa minimum wage ang kinita batay sa rami ng parcel na nabalot, kailangan pa ring matanggap ng worker ang minimum wage na umiiral sa kanilang rehiyon. Kung lalampas naman dito ang kinita, dapat matanggap ng worker ang buong halaga.
Sinabi naman ni Rosmar sa kanyang post na makatatanggap pa rin ng minimum rate ang mga worker kahit hindi umabot dito ang kita mula sa pagbabalot, habang may dagdag na kita at bonus para sa mga makakabalot nang higit sa itinakdang dami.
- Latest
