Mga paaralan sa San Juan lalagyan ng walk-through metal detector
MANILA, Philippines — Maglalagay ng walk-through metal detector at karagdagang handheld metal detector sa mga pampublikong paaralan sa San Juan City bilang bahagi ng pagpapalakas ng seguridad, ayon kay Mayor Francis Zamora nitong Linggo.
Sinabi ni Zamora na inaprubahan na ng Local School Board (LSB) ang resolusyong nagbibigay-daan sa paglalaan ng pondo para sa pagbili ng mga kagamitan. Layunin nitong mapalakas ang screening at pagbabantay sa mga taong pumapasok sa mga paaralan.
Noong Agosto, inihayag ng Department of Education (DepEd) ang plano nitong magbigay ng metal detectors sa lahat ng pampublikong paaralan sa bansa dahil sa mga ulat ng mga mag-aaral na nagdadala ng mapanganib na armas sa loob ng paaralan.
Kasunod ito ng mga naitalang insidente ng karahasan sa mga paaralan, kabilang ang pamamaril sa isang paaralan sa Tacloban City at ang insidente sa Zamboanga City kung saan dalawang estudyante ang nasawi at nagpakamatay ang suspek.
- Latest
