Gobert gisilotan na sab sa NBA
CEBU, Philippines — Ang sentro sa Minnesota Timberwolves nga si Rudy Gobert gipahamtangan og $75,000 nga multa sa NBA kagahapong adlawa. Kini tungod sa dili makiangayon ug dili propesyonal niyang binutahan pagkuwestiyon sa integridad sa liga ug sa mga reperi.
Ang dili maayong aksiyon ni Gobert nakuha sa mga camera sa telebisyon atol sa 107-115 nga kapildihan sa Wolves ngadto sa Denver Nuggets atol sa game 4 sa ilang best-of-seven NBA Western Conference semifinal series niadtong Lunes didto sa Minneapolis.
Nahitabo kini human si Gobert gitawgan og foul sa nahibilin na 4:10 sa katapusang kuwarter.
Sa miaging semana, si Gobert nakadaog sa ikaupat niyang NBA Defensive Player of the Year award.
Sa opisyal nga pamahayag, ang NBA nagkanayon nga gisilotan na sab nila si Gobert tungod sa kanunay na niining pagpanaway sa mga opisyal sa duwa.
Niadtong Marso, si Gobert gipamulta og $100,000 sa liga sa susama gihapon nga binuhatan atol sa 113-104 nilang kapidlihan sud sa overtime batok sa Cleveland Cavaliers. Human sa maong duwa, si Gobert namahayag nga ang sugal nakadaut sa sport, butang nga gipalagan sa NBA.
- Latest
