Trillanes, AMLC, LRA tetestigo sa impeachment

MANILA, Philippines — Nakatakdang iharap ng prosecution panel ang mga opisyal ng Anti-Money Laundering Council (AMLC),Land Registration Authority (LRA) at si dating Senador Antonio “Sonny “ Trillanes IV sa impeachment trial na gagawin ng buong araw.

Sinabi ni House prosecutor Bicol Saro ­Partylist Rep. Terry Ridon na nag-break muna nitong Miyerkules ang Senate impeachment court upang maihanda ang susunod na bahagi ng presentasyon sa Article II ‘unexplained wealth’ sa ilalim ng Articles of Impeachment.

Inihayag ni Ridon na nirerebyu na ng prosecution panel ang latag ng ipiprisintang mga testigo sa impeachment trial matapos na kuwestiyunin ni Senate Presiding Officer Senator Chiz Escudero kung sino ang mauuna dahilan hindi pa nai-subpoena si dating Senador Antonio Trillanes IV na nagboluntaryo naman na tumestigo at ibahagi ang kaniyang mga nalalaman.

Iginiit ni Ridon na patuloy nilang patitibayin ang Article II laban kay VP Sara kaugnay ng pananagutan nito sa batas.