Team Norbert, Sambag nangu mga kampiyon sa Poblacion Oriental caging

CEBU, Philippines — Ang Team Norbert ug Sambag maoy nangu sa listahan sa mga kampiyon sa Poblacion Oriental Summer Basketball League 2018 nga hingpit nang nahuman niadtong Domingo didto sa Poblacion Oriental covered court sa lungsod sa Consolacion.

Si Bret Michael Alivio mitagak og 25 puntos, si Danny Naya midugang og 22 ug si Dominic Semblante miiskor og 18 sa dihang gipayaka sa Team Norbert ang Team Randy, 104-95 aron pagsakmit sa titulo sa inter-sitio category.

Samtang ang Sambag mibihag sa Panthers, 98-89 aron paglangkat sa  korona sa junior division.

Si Chuckie Sanchez mopabuto og 29 puntos ug si Niño Casinillo mikadlit og 24 puntos alang sa Sambag nga wala na molingi pa sukad miposte og 48-39 nga labaw sa halftime.

Ang O.G. ug Lyn Basketball mikuha sab og atensiyon human gidominar ang tagsa-tagsa nila ka mga kategoriya.

Gipilde sa O.G. ang Riverside, 81-73 aron paghari sa mini category, samtang ang Lyn Basketball mipukan sa Centro, 94-87 aron pagbira sa korona sa midget division.

Si John Sent Naya maoy nangu sa O.G. uban ang 21 puntos ug gisundan kini nilang Daniel Semblante nga dunay 16 puntos ug ni Rikoy Yap nga dunay 12 puntos, samtang si John Paul Boyles mibida sa Lyn Basketball uban ang 24 puntos inabagan nilang Jetro Solermo ug Jobert Maglasang nga nagkumboya'g 39 puntos.

Gipasidunggan nga mga Most Valuable Players mao sila si Jansen Naya (mini), Dodong Boyles (midget), Nino Icot (junior) ug Remejias Semblante, Jr. (inter-sitio).

Gipahigayon aron pagdugang og lamas sa pista sa Poblacion Oriental agi'g pangilin sa mahal nilang patron nga si Sr. San Roque, ang tinuig nga torneyo nagmalampuson gumikan sa hugtanong suporta nilang Barangay Captain  Melquiades 'Leking' Caylan ug sports chairman Eva Malagar.

Ag mga duwa gipadagan nilang sports commissioner Joven 'Baste' Alivio inabagan nilang Margarette Rosal ug Narciso Monterolla. (BANAT NEWS)