VP Sara, plinano na umupong presidente – Palasyo
Sa panawagang magbitiw si Pangulong Marcos
MANILA, Philippines — Binuweltahan ng Malacañang si Vice President Sara Duterte matapos niyang banatan si Pangulong Ferdinand Marcos Jr. at nanawagan ng pagbibitiw nito.
Ayon kay Palace Press Officer Claire Castro, nais pababain ni VP Duterte ang Pangulong Marcos sa posisyon dahil gusto niyang agad-agad na umupong presidente.
“Nais niyang pababain ang Pangulo sa posisyon? Bakit? Gusto ninyo? Gusto ni Bise Presidente agad-agad umupo? Kita naman, even before, ang plano ninyo,” giit pa ni Castro.
Sinagot din ni Castro ang pahayag ni Duterte na ang mga Filipio ay naliligo sa tubig baha.
“Hindi po kinakaila na nagbabaha po. Hindi lang naman sa Pilipinas. Nandiyan din po yung Japan, Canada, Grand Canyon, South Korea. Lahat po ngayon ay binabaha,” ayon kay Castro.
Paliwanag ni Castro, hindi naman iniiwasan at tinatalikuran ang mga issue tungkol sa flood control projects at alam din ng mga kababayan na nangyayari ang tuluy-tuloy na pag-iimbestiga sa anomalya.
Sa halip aniya dapat unahin ni Duterte na tutukan ang mga pagbaha sa Davao City para mas makatulong sa bansa at hayaan ang Pangulo sa ibang mga lugar, bagama’t tumutulong din naman siya sa Davao City.
- Latest
