Pangandam sa pag-unlod
Sukad pa sa 2013, human sa makalilisang nga linog nga nitay-og sa Bohol ug Sugbo, nga nakabantay ang mga molupyo sa isla sa Batasan sa lungsod sa Tubigon nga nagsugod na og sud ang dagat sa ilang kabalayan. May nangagpas nga niunlod ang isla tungod sa linog. May nangagpas sab nga tungod sa padayong pagdako sa dagat tungod sa climate change.
Bisan unsa pay hinungdan, nahulga ang mga molupyo. Nahasol ang ilang mga panginabuhi. Napukaw ang ilang pagkatug kon taob sa lawom nga gabii. Nawad-an og kahulogan ang mga pangandoy.
* * *
Bisan sa kadako sa nag-ung-ong nga katalagman, way nagtagad sa pagtabang sa mga molupyo. Mga opisyal sa mga barangay igo lang nitambag nga patas-an ang ilang mga higdaanan ug mga butanganan. Mga opisyal sa lungsod nibalibad nga way kuwarta sa pagbalhin nila sa mas luwas nga mga pinuy-anan.
Mga opisyal na ba sa Kapitolyo sa Tagbilaran City igo lang nilili sa ilang kahimtang. Napahibawo nang nasudnong gobyerno. Nideklarar nang Department of Environment and Natural Resources nga di luwas nga puy-an ang isla. Pero wa pay tabang sa mga molupyo.
* * *
May tanyag na hinuon ang National Housing Authority nga P50 milyones para sa alternatibong mga pinuy-anan. Nga para sa munisipyo kuwang kaayo sa pagpahimutang sa 600 ka apektadong mga pamilya.
Ambot may bakante pa bang luna ang Tubigon ug kasilinganang mga lungsod para sa relocation sites. Ambot may pundo ba pagtukod og dalan ug pagtaod og kuryente ug tubig. Pero dili ni balido nga lusot nga pasagdan na lang ang taga Batasan nga lamyon sa dagat.
* * *
Mas andam ang ubang kanasuran sa posibleng pagkalumos sa ilang katawhan. May nasud nga mopalit og luna sa laing nasud nga mas layo sa dagat. May mga nasud nga ang mga politiko naglalis na unsay mas maayong kapilian: pagbakwet paingon sa mga nasud nga nitanyag nila og visas; o pagpahabog sa ilang mga isla.
Dinhi sa ato, may mga opisyal sa gobiyerno nga nipasalig nga ang kinaiyahan mopatubo sa atong mga isla aron di maabot sa mga bawod. O ang Ginoo mas kasaligan nga mopahiluna natong tanan. Sa kasamtangan, padayong gitugotan ang pagguba sa atong kabukiran.
* * *
- Latest
