Banana chips ug diabetes
Lisod nang daan para ni Bise Presidente Sara Duterte ang pagpasabot atubangan sa senator judges sa iyang hulga pagpapatay nilang Presidente Ferdinand Marcos Jr., First Lady Liza Araneta Marcos ug kanhi House Speaker Martin Romualdez ug sa pataka nga gasto sa P612.5 milyones nga confidential funds.
Mas lisod pa g'yod para niya ang pagpasabot sa higanteng kang-a sa binilyon ka pesos sa iyang bank accounts ug sa zero cash nga gideklarar sa iyang statements of assets, liabilities and net worth (SALNs) ug sa pagdawat og kuwarta gikan sa China.
-o0o-
Pero dili sab mahimo nga magpakahilom. Kinahanglan nga motingog sa dili pa makumbinser ang iyang mga dumadapig nga akong ilad ang iyang pagkaon og kwek-kwek daplin sa dalan. Maong nagpatawag og press conference niadtong Martes.
Si kanhi police officer Rodulfo Gracioso Jr. na lang ang iyang gipahimungtan. Gawas nga gitawag nga bakakon ginganlan pa gyod og homophobic kay giapil og pasangil ang iyang sinaligan nga bayot. Aron paglipat sa katawhan nikumpisal na lang sab nga dili niya paborito ang Royce chocolates kay naproblema diay sa diabetes ang ilang pamilya.
-o0o-
Mas sayon tinuod para ni VP Sara ang pag-atake nilang Gracioso, Direktor Melvin Matibag sa National Bureau of Investigation (NBI), House Prosecutor Terry Ridon ug ang iyang kanhi BFF nga si Presidente Ferdinand Marcos Jr.
Kay sa pagpasabot nganong niabot og P4.4 bilyones ang mga transaksiyon sa iyang bank accounts bisan nakurhian nang system bug sa Bank of the Philippine Islands (BPI) ug nihiyos ang orihinal nga report sa Anti-Money Laundering Council nga P6.77 bilyones.
-o0o-
Mas masabtan sa iyang mga dumadapig sa iyang kabalaka nga mahisama sa iyang amahan (nga diabetic) ug iyang inahan (nga pre-diabetic) maong naglikay sa chocolates (labi na sa Royce) ug ice cream (hinaot walay maka-utingkay sa karaan niyang interviews nga maneguro og palit og chocolates ug ice cream kon makalugar og groceries).
Kay sa pag-esplikar sa P1.3 bilyones nga iyang nadawat gikan sa mga kompaniya sa China pinaagi sa Tapang at Malasakit Foundation ug Cale88 Foods Corporation ug pagpasalig nga para classrooms ug banana chips ra ang mga transaksiyon ug wala ipakapin ang West Philippine Sea.
- Latest
