2 ka pulis angol sa rally
CEBU, Philippines — Duha ka personnel sa Cebu City Police Office (CCPO) ang naangol human misangko sa komosyon ang demonstrasyon sa nagkadaiyang progresibong grupo sa Colon Street, Cebu City, niadtong Lunes, Nobyembre 16, 2026.
Gibutyag sa CCPO nga mokabat sa 450 ka indibidwal ang miapil sa maong rally nga gipahigayon gikan alas-9:00 sa buntag hangtod alas-12:00 sa udto.
Matod sa kapulisan, walay nakuha nga permit gikan sa lokal nga kagamhanan ang maong kalihokan, apan gihatagan gihapon nila og maximum tolerance ang mga raliyista aron matahod ang ilang katungod sa kagawasan sa pagpahayag ug malinawong pagpundok.
Ang rally konektado ni sa gipahigayong Association of Southeast Asian Nation Summit and Related Summits didto sa kaulohan nga gitambongan sa nagkadaiyang mga lider sa ASEAN ug mga dialogue partner countries.
Nagsugod ang kagubot human nga gikatahong gibadlong sa mga polis ang mga nagprotesta nga nagsunog og effigy sa dalan.
Gikataho nga gipasidan-an nang daan ang mga raliyista nga dili kini buhaton tungod sa peligro niini sa publiko.
Gipasabot sa CCPO nga peligroso ang maong aksiyon tungod kay adunay mga kable sa kuryente ibabaw sa dapit diin gisunog ang effigy, ug kalapasan sab kini sa probisyon sa Batas Pambansa Blg. 880. Sa dihang gihangyo sa kapulisan nga undangon ang pagsunog, nahimong agresibo ang pipila ka raliyista nga gilangkuban sa mga estudyante ug mga sakop sa transport group nga PISTON.
Misulay ang mga personnel sa City Disaster Risk Reduction and Management Office (CDRRMO) sa pagpalong sa kalayo gamit ang fire extinguisher, apan usa sa mga raliyista nakigbinunlotay sa mga polis para ilugon ang fire extinguisher.
Tungod ana, nibabag ang mga sakop sa Civild Disturbance Management apan nagkainitay man hinuon.
Dunay mga videos nga nanggawas sa social media nga dunay raliyistang ni-flying kick pa sa taming sa mga polis, dunay nakigbinunlotay para kuhaon ang ilang kaubang nakuptan sa polis.
Dihang nigrabe na ang kagubot, dunay tear gas nga gigamit hinungdan nga nag-iyahay og padaplin ang mga raliyista.
Ang komosyon niresulta sa pagkasamad sa duha ka polis, walay na-report nga dunay mga nasamdan sa habig sa mga raliyista.
Gisubay na sa mga polis kun kinsa katong nagsunog sa effigy ug nakasamad sa mga pulis ug nagpasiugda kagubot para pasakaan og kaso.
Ang dalan Colon usa ka publikong dalan diin daghang sakyanan ug mga pedestrians ang moagi kada adlaw, apan nahimo sab kining abutanan sa mga demonstrasyon sa mga lihok protesta matag karon ug unya.
Sigon sa kapulisan nga ilang gitahod ang katungod sa katawhan sa pagpadayag ug malinawong pagpundok, apan kinahanglang motuman ang protesters sa balaod ug dili makahasol sa uban. (BANAT NEWS)
- Latest















