ARANGKADA - Pagpaningil nga dili kabalibaran

Sukad sa pagsugod sa Senate impeachment trial niadtong Hulyo hangtod sa niaging buwan, nagsige og pasangil si Bise Presidente Sara Duterte nga ang prosekusyon kutob ra sa istorya pero walay napakita nga mga ebidensiya.

Sa niaging semana, dihang magsugod na unta ang prosekusyon sa pagpresentar sa reports sa Anti-Money Laundering Council (AMLC) gikan sa mga bangko nga gisaligan nilang VP Sara, sa iyang bana ug sa iyang amahan sa binilyon ka pesos nilang mga transaksiyon, niinsistir ang depensa nga confidential ang mga dokumento ug busa dili angayng tukion sa husay.

-o0o-

Sa niaging tulo ka buwan, naklaro na unsaon pagpanalipod ni VP Sara ang iyang kaugalingon gikan sa seryusong mga pasangil batok niya: Paglangay ug paglawgaw sa proseso, pagpakauwaw sa senator-judges (nga dili niya alyado) nga mga itoy sa administrasyon, ug pagkumbinser sa iyang mga dumadapig sa dili pagdawat sa bisan unsang desisyon sa pagkonbikto, pagpalagpot niya sa puwesto, ug pag-disqualify niya sa 2028.

Pero dili paigo ang mga maniobra. Kinahanglang pugngan ang kinakusgan nga mga ebidensiya. Kay kon mabisto, peligrong hasta ang panatiko nga mga dumadapig mobalikas niya.

-o0o-

Dili tinuod nga wala pay mga ebidensiya nga napakita ang prosekusyon. Napamatud-an nila ang hulga ni VP Sara sa pagpatay nilang Presidente Ferdinand Marcos Jr., First Lady Liza Marcos, ug kanhi House speaker Martin Romualdez ginamit ang iyang kaugalingon nga online press conference.

Napamatud-an sab ang pagkawat sa confidential funds ginamit ang mga dokumento ug mga ngalan nga gipatakaan lang sa iyang opisina ug mga testimoniya sa mga sinaligan nga iyang gisugo paglapas sa mga lagda.

-o0o-

Pero karaan nang unang duha ka pasangil. Nga bisan gisumsoman sa niaging duha na ka tuig wala mapakahagsa sa iyang popularity ratings. Maong kumbinsido nga mahimo rang ilubong sa naandan nga paglibug-libog.

Makadaot kon mapamatud-an ang ilang bilyones. Maguba ang salida sa pagkaon og kwek-kwek ug pagpatuo nga mahimong wala silay batasan pero dili mga kawatan. Daotang balita parang VP Sara: Dili niya mailad ang impeachment trial, ang Korte Suprema, ang militar ug kapolisan, ug ang kinabag-an sa katawhan. Nga gawas nga nibalibad sa giawhag nga people power nakahukom na sa dili pagpabalik sa ilang pamilya sa Malacañang.