Lisensya ng taxi driver na naglabas ng itak, sinuspinde
MANILA, Philippines — Pinasuspindi ni Department of Transportation (DOTr) Secretary Vince Dizon ang lisensya ng isang taxi driver sa Iloilo City na naglabas ng itak laban sa nakagitgitang rider.
Ayon kay Dizon, bukod sa masuspinde ay maaaring makansela rin ang prangkisa ng taxi.
Sa ulat, naganap ang insidente noong Nobyembre 11, 2026, dakong alas-10:00 ng umaga sa Barangay Ungka, Jaro District, sa Iloilo City.
Minamaneho ng driver ang isang asul na taxi nang may makagitgitan itong isang rider.
Sa isang viral video, makikitang naglabas ng itak ang taxi driver at inihampas sa bintana ng taxi, na ikinagulat at ikinatakot ng pasahero na kanyang katabi.
Kaagad namang tumalima at naglabas ang Land Transportation Office (LTO) ng preventive suspension order laban sa driver dahil sa reckless driving at sinuspinde ang kanyang lisensiya sa loob ng 90 araw.
Inisyuhan rin ng Land Transportation Franchising and Regulatory Board (LTFRB) ng show cause order ang May 17 Transport Corp, na siyang operator ng taxi at inatasang magpaliwanag kung bakit hindi dapat na suspindihin o kanselahin ang kanilang Certificate of Public Convenience dahil sa insidente.
- Latest















