Tumulak nidasig sa pagbutang og hydration stations

CEBU, Philippines — Gidasig ni Konsehal David “Dave” Tumulak ang tanang establisamento, negosyo, opisina sa gobiyerno, pribadong institusyon, relihiyosong organisasyon ug mga residente sa Dakbayan sa Sugbo nga magbutang og mga hydration station o libreng tubigan diha sa estratehikong mga pampublikong lugar aron mapanalipdan ang katawhan batok sa grabeng kainit nga dala sa El Niño.

Tumong sa maong sugyot mao ang pagpalig-on sa pagpangandam sa siyudad alang sa epekto sa El Niño ilabi na ang posibleng pagsaka sa heat index nga mahimong hinungdan sa dehydration, heat exhaustion, heat stroke, ug uban pa’ng sakit gumikan sa grabeng kainit.

Base sa taho sa Philippine Atmospheric, Geophysical and Astronomical Services Administration (PAGASA) niadtong Nobiyembre 4, 2026, masinati na karon ang El Niño sa tropical nga bahin sa dagat Pasipiko ug gibana-bana nga magpadayon kini hangtud sa Hunyo sa tuig 2027.

Gilaoman usab nga masinati ang mas init nga panahon kompara sa naandang temperatura sa kasagaran sa mga bahin sa nasud.

Ubos sa resolusyon ni Tumulak, giila nga ang labing nanginahanglan og proteksiyon batok sa grabeng kainit ang mga bata, senior citizens, persons with disabilities (PWDs), mga mamumuo nga nagtrabaho sa gawas, mga pasahero ug uban pa’ng vulnerable sector sa komunidad. Gisugyot nga butangan og hydration station ang mga lugar nga daghan og tawo, sama sa mga plaza, park, terminal, commercial spaces, merkado, opisina sa gobiyerno, eskwelahan, ug mga nagkadaiyang pasilidad nga adunay daghang tawo.

Apil usab sa mga prayoridad nga lugar ang mga simbahan ilabi na ang mga dapit nga kasagarang pahigayonan og dagkong kalihokan ilabi na nga hapit na ang Pasko ug Fiesta Señor o Sinulog diin adunay mahitabong relihiyosong prosisyon ug uban pa’ng kalihokan nga ipahigayon sa gawas.

Mahimong mopili ang mga partisipanteng establisamento ug organisasyon sa angay nga pamaagi sa paghatag og tubig lakip ang lugar diin ibutang ang permamenteng tubigan, mobile hydration units o ang pakigtambayayong sa mga negosyo nga motanyag og libreng refill sa tubig nga mainom.

Gitumbok ni Tumulak nga kinahanglan nga limpiyo ang tinubdan sa tubig ug adunay klarong marka ang mga hydration station aron dali kining mailhan sa publiko.

Giawhag usab ang paggamit sa reusable water bottles, tumblers, ug kaugalingong sudlanan sa tubig aron malikayan ang sobrang paggamit sa mga plastik nga botilya.

Gisugyot usab ang pagpahigayon og mga kampaniya sa pagpahibalo bahin sa importansiya sa kanunay nga pag-inom og tubig, paglikay sa heat-related illnesses, ug pagpahibalo sa publiko kon asa nahimutang ang mga hydration station. BDB BANAT NEWS