Ilegal nga ga-refill og butante gidakop

CEBU, Philippines — Gidakop ang usa ka 26-anyos nga lalaki human giingong nasakpan sa aktong pag-refill sa mga butane canister nga may tatak nga Rufrance nga walay otorisasyon gikan sa kompanya diha sa Barangay Canduman, Mandaue City, alas 1:23 sa hapon niadtong Martes, Oktubre 13.

Ang gidakop mao si Hanz Nathaniel Gonzaga, empleyado ug salesman sa uysa ka establisamento nga nahimutang sa Kobe, Barangay Canduman, Mandaue City.

Gipahigayon ang operasyon sa mga operatiba sa Criminal Investigation and Detection Group (CIDG) Mandaue City Field Unit uban sa pakig-koordinasyon sa Police Station 6 sa Mandaue City Police Office (MCPO), ug sa tabang sa representante sa Cebu Rufrance Multi Gas Corp.

Gibase ang operasyon sa pormal nga reklamo sa maong kompanya nga nag-akusar sa maong establisamento nga ga-refill og mga Rufrance -brand butane canisters nga walay pagtugot gikan sa ilang kompanya.

Matud sa otoridad, giingong nasakpan si Gonzaga samtang nag-refill sa mga butane canister sa daplin sa dalan, tupad sa establisemento ug sulod sa usa ka komunidad nga daghan og balay.

Bisan og nakapresentar ang maong establisamento og License to Operate nga gi-isyu sa Rufrance, wala kini awtomatikong nagpasabot nga otorisado ang establisemento sa pag-refill sa mga butane canisters nga may tatak sa maong kompanya.

Tungod niini, gidakop si Gonzaga tungod sa giingong paglapas sa Sections 40(d) ug 40(e), in relation to Section 41(f), sa Republic Act No. 11592, o ang balaod nga nag-regulate sa industriya sa liquefied petroleum gas (LPG).

Gibanabana nga mokabat sa ?350,000 ang kinatibuk-ang kantidad sa mga gikompiskar nga ebidensiya.

Human sa operasyon, gidala ang dinakpan sa CIDG Mandaue City Field Unit mag atubang og kasong kalapasan sa Republic Act No. 11592.   IBM BANAT NEWS