2 tauhan ng BOC sa Bulacan raid, kinasuhan

MANILA, Philippines — Dalawang tauhan ng Bureau of Customs (BOC) na sangkot sa ikinasang raid sa warehouse sa Bulacan kung saan may mga nadatnang smuggled na sigarilyo ang kinasuhan ng Philippine National Police-Highway Patrol Group (PNP-HPG).

Batay sa pitong pahinang reklamo ni PNP-HPG Police Corporal Melvin Habbiling na nagsilbing middleman umano si Jesus Froilan Acebes Carpiso.

Si Carpiso ang tumukoy kina BOC Special Agent Lucky Joy “Joy” Solmayor at BOC Technical Support Staff Alexander “Alex” Arroyo Jr. na kabilang sa mga nadatnan sa ikinasang raid.

Batay sa reklamo, inihirit na maisaila­lim sa preliminary invetigation sina Solmayor, Arroyo, at isa pang Jocelyn Miano Ban­cairen para sa pagtukoy ng probable cause at pag-iisyu ng subpoena laban sa mga ito.

Sa sworn affidavit ni Carpiso na sina Solmayor at Arroyo ay kapwa nakita sa Bulacan warehouse nang isagawa ang pagsa­lakay ng mga tauhan ng Regional Highway Patrol Unit-National Capital Region.

Positibo ring tinukoy ni Carpiso ang dalawa na tumanggap ng kabayaran kapalit ng 225 boxes ng smuggled Red Carnival cigarettes sa entrapment o buy-bust operation, na ginawa noong Agosto 19.

Ayon naman kay Customs Commissioner Ariel Nepomuceno, sinabi nitong hindi niya kilala ang mga alyas “Joy” at “Alex” na sangkot sa raid.

Batay sa BOC memorandum na may petsang August 20, tinukoy sina Solmayor at Arroyo bilang Special Agent I at Admi­nistrative Aide I mula sa Customs Intelligence and investigation Service-Intelligence Group at kabilang sa mga naghanda ng incident report sa nangya­ring Bulacan raid.