Palparan iniharap sa pamilya ng 2 missing UP students

MANILA, Philippines — Personal na iniharap ng Bureau of Corrections (BuCor) si convicted retired Philippine Army Major General Jovito Palparan sa pamilya ng nawawalang UP students na sina Sherlyn Cadapan at Karen Empeño upang mawala na ang pagdududa na inilipat ito sa ibang pasilidad mula sa New Bilibid Prison (NBP).

Sinabi ni NBP Superintendent Gary Garcia, sa isang ulat kay BuCor Director General Gregorio Pio Catapang Jr., na ang kahilingan ay tinugunan sa parehong araw na natanggap ito. Aniya, pinayagan ang mga nagrereklamo na makipagkita kay Palparan nang mahigit isang oras.

Si Palparan ay nahatulan noong 2018 ng reclusion perpetua para sa kanyang papel sa pagkidnap at illegal detention ng nabanggit na UP students na nawala noong 2006, sa mga kasong itinuturing ng mga grupo ng human rights bilang sapilitang pagkawala.

Napatunayan sa pagpupulong nina Erlinda Cadapan at Concepcion Empeño, na hindi totoo na wala sa NBP si Palparan.